مەریوان؛ سەلاح ئازادی بە دانانی کەفاڵەت ئازاد کرا
ڕۆژی شەممە ٢٧ی خاکەلێوە، "سەلاح ئازادی" چالاکی سێنفیی مامۆستایانی مەریوان، بۆ داکۆکی لە تۆمەتی وەپاڵدراوی لە لقی ١ی لێپرەسی دادگای ئینقلابی ئەو شارە ئامادە و لە کۆتایی لێپرسینەوەکەی بە دانانی کەفاڵەت هەتا کاتی دادگاییەکەی ئازاد کرا.
ئەو چالاکە سێنفییە لەگەڵ ژمارەیەکی دیکە لە هاوکاران و ئەندامانی هەیئەتی بەڕێوەبەری ئەنجومەنی سێنفیی مامۆستایانی مەریوان، لە لقی ١ی لێپرسی دادگای ئینقلابی مەریوان ئامادە ببوون.
"سەلاح ئازادی" بە تۆمەتی "پڕوپاگەندە دژی نیزامی کۆماری ئیسلامی، تێکدانی بیروڕای گشتی و لایەنگەری لە یەکێک لە حیزبە کوردییەکان لە ڕێگای بڵاوکردنەوەی فیلم و وێنە" بانگهێشتی دادسەرای گشتی و ئینقلابی شاری مەریوان کرابوو.
ڕۆژی پێنجشەممە ١٨ی خاکەلێوە، سەلاح ئازادی بانگهێشتی پۆلیسی فەتای مەریوان کرابوو و پاش لێپرسینەوە، دەستیان بەسەر مۆبایلەکەیدا گرتبوو، هەروەها دۆسیەکەی ڕەوانەی لقی ١ی لێپرسی دادگای ئینقلابی مەریوان کرابوو.
پاش بانگهێشتکردنی ئەو چالاکە سێنفییە، ئەنجومەنی سێنفیی مامۆستایانی کوردستان- مەریوان بە بڵاوکردنەوەی بەیاننامەیەک وێڕای مەحکوومکردنی هەر جۆرە بانگهێشت و دۆسیەسازیی ئەمنییەتی- سیاسی بۆ چالاکانی سێنفی، خوازیاری ڕاگرتنی دەسبەجێی دۆسیەسازیی ئەمنییەتی بۆ سەلاح ئازادی و تەواوی چالاکانی سێنفیی سەرتاسەری ئێران بوو.
