مێرمنداڵێکی تەمەن ١٧ ساڵ لە پیرانشار دەسبەسەر کرا
کاتژمێر ١ی شەوی دووشەممە ٢٢ی بانەمەڕ، هێزە ئیتلاعاتییەکان لە شارۆچکه "پەسوێـ"ـی شاری پیرانشار، مێرمنداڵێکی تەمەن ١٧ ساڵەیان بە ناوی "سەمیع شەریفیان" کوڕی "حەسەن" دەسبەسەر کرد و بۆ شوێنێکی نادیاریان ڕاگواست.
بە وتەی سەرچاوەیەکی ئاگادار، هێزە ئیتلاعاتییەکان نیوە شەو هێرشیان کردووەتە سەر ماڵی باوکی ئەو مێرمنداڵە و دەسبەسەریان کردووە.
ئەو سەرچاوەیە هەروەها ئەوەشی خستەڕوو، هێزە ئیتلاعاتییەکان لە کاتی دەسبەسەرکردنی "سەمیع شەریفیان"، لە "سپری" کەڵکیان وەرگرتووە و "سپریـ"ـان بە سەر دەموچاوی باوک و دایکی "سەمیعـ"ـیش پاشیوە و ئەو ژن و مێردەیان ئازار داوە.
ئە سەرچاوەیە هەورەها دەڵێت: "هێزە ئیتلاعاتییەکان بەبێ هیچ ڕوونکردنەوەیەک بەو بنەماڵەیە ئەو مێرمنداڵە کوردەیان دەسبەسەر کردووە".
هەتا کاتی بڵاوبوونەوەی ئەم هەواڵە، هیچ زانیارییەک لەمەڕ چارەنووس و شوێنی ڕاگیرانی ئەو مێرمنداڵە کوردە لەبەر دەستدا نییە.
