لە ماوەی سێ مانگی سەرەتای ئەمساڵ ٦٧ هاووڵاتیی کورد دەسبەسەر کراون
بیاڤی چالاکییەکان: "چالاکێکی ژینگەپارێزی، دوو چالاکی مەدەنی، چوار ڕۆژنامەنووس، پارێزەرێک، سێ چالاکی فەزای مەجازی، چالاکێکی مافی ژنان، دە چالاکی سوننی مەزهەب و دوو ئەندامی مەکتەب قورئان".
هۆکار و چەشنی دەسبەسەر کردنی هاووڵاتییان: "٦٦ کەس لە هاووڵاتییان لەلایەن هێزە ئەمنییەتییەکانەوە و کەسێک لەلایەن لیباس شەخسییەکانەوە دەسبەسەر کراون".
چارەنووسی ٦٥ کەس و شوێنی ڕاگرتنی ٣٥ کەس پاش دەسبەسەرکردنیان ناڕوونە.
ماڵی ٢٥ کەس لەلایەن هێزە ئەمنییەتی و ئیتلاعاتییەکانەوە هێرشی کراوەتە سەر و پشکێندراون و کەرەستەی شەخسیی ٣ هاووڵاتی لەلایەن ئەو هێزانەوە دەستی بەسەردا گیراوە.
٣ هاووڵاتی لە کاتی دەسبەسەرکرانیاندا لەلایەن هێزە ئەمنییەتییەکانەوە ئازار و ئەشکەنجە دراون و هاووڵاتییەک بریندار بووە.
دوو کەس لە دەسبەسەرکراوەکان ژن بوون.
تەنیا تۆمەتی ١٤ کەس لە کاتی دەسبەسەریدا ڕوونە.
٤ کەس بە تۆمەتی هاوکاری لەگەڵ یەکێک لە حیزبە کوردییەکان، ٣ کەس بە تۆمەتی ڕاگرتنی ئاڵای کوردستان، ٥ کەس بە تۆمەتی چالاکی لە فەزای مەجازی دژی کۆماری ئیسلامی، کەسێک بە تۆمەتی چالاکیی مەزهەبی و هاووڵاتییەک بە تۆمەتی هاوکاریکردنی زیندانییانی هەڵاتوو لە زیندانی سەقز.
دەبێ بوترێت کە لەو ماوەیەدا، دەسبەسەرکردنی بە کۆمەڵ و سیستماتیک، بەتایبەت لە شارەکانی بانە و پیرانشار لەلایەن ناوەندە ئەمنییەتییەکانەوە ڕوویداوە (دەسبەسەرکردنی ١٣ کەس لە پیرانشار و ٨ کەس لە بانە).
