لە تاجیكستان گرووپێكی نمایشی منداڵانی مەهاباد نوێنەرایەتیی ئێران دەكات

كوردپا: نمایشی بووكە شووشەی ناوەندی پەروەردەیی فیكری منداڵان و مێرمنداڵانی شاری مەهاباد وەكوو تەنیا نوێنەری وڵاتی ئێران لە سێیەمین ڤێستیڤاڵی نمایشی بووكە شووشە لە وڵاتی تاجیكستان نمایش كرا.

سەحەر مهرەبانی چالاكی ئەدەبیی و پەروەردەیی منداڵان لە شاری مەهاباد بە هەواڵدەریی كوردپای راگەیاند، ئەو نمایشە بە شێوەی \"دەست و سێبەر\" بەڕێوە دەچێت.


مهرەبانی وتیشی: ناوەڕۆكی نمایشەكە، \"مێروولەیەكە كە لە سەفەردا بەدوای وەدەست خستنی زانیارییە\".

سەحەر مهرەبانی نووسەری ئەو نمایشە لە درێژەی لێدوانەكەیدا بۆ ئاژانسی كوردپا وتی: نمایشی بووكە شووشەی \"گروفالو\" لەلایەن 7 كەسەوە نمایش دەكرێت و تارا مهرەبانی، ژینا فەلاحی، ئارینا زیایی و بەهارە ئەهرابی لە ئەكتەرە سەرەكییەكانی نمایشی بووكە شووشە لە وڵاتی تاجیكستانن.

ئەو نمایشە لە دەرهێنەریی شەهرام ئیراندوست و بە زمانی كوردی بەڕێوە دەچێت.