"سەعید شێرزاد" لە زیندانی ڕەجایی شاری کەرەج ئازاد کرا
سەعید شێرزاد، ئەمڕۆ شەممە ١٣ی بانەمەڕ، پاش تەواو کردنی ماوەی زیندانییەکەی، لە زیندانی ڕەجایی شاری کەرەج ئازاد کرا.
ئەو زیندانییە سیاسییە، مانگی ڕەزبەری ساڵی ٩٨، دوو حەوتوو پاش کۆچی دوایی دایکی، سەرەڕای بیانووهێنانەوەی زۆری بەرپرسانی زیندان، ئیزنی هاتنە مورەخەسیی پێدرابوو.
سەعید شێرزاد چەندین جار و بۆ ماوەیەکی درێژە بەهۆی ناڕەزایەتی دەربڕین لەمەڕ دۆخی نالەباری زیندانی ڕەجایی شاری کەرەج، بێبەریبوون لە دەوا و دەرمانی پزیشکی و گوشار بۆ سەر زیندانییەکان، دەستی دابووە مانگرتن.
"سەعید شیرزاد"، چالاکی مافی منداڵان، ١٢ی پووشپەڕی ساڵی ٩٣، لە شوێنی کارەکەی لە پاڵاوگەی تەورێز دەسبەسەر کرا و بۆ ماوەی ٢ مانگ لە ژوورە تاکەکەسییەکانی بەندی ٢٠٩ی زیندانی ئەوینی تاران، بەهۆی داکۆکیکردن لە مافی منداڵانی کار و هەروەها پەیوەندی لەگەڵ بنەماڵەی زیندانییانی سیاسی، لێپرسینەوەی لەگەڵ کرا. پاش ئەو ماوەیە ناوبراو بۆ بەندی ٨ی زیندانی ئەوین گوازرایەوە و پاش ماوەیەکی کورت و بەبێ هیچ هۆکارێکی تایبەت، بۆ زیندانی ڕەجایی شاری کەرەج ڕاگوێزرا.
ئەو زیندانییە سیاسییە، لە مانگی خەرمانانی ساڵی ٩٤، لەلایەن لقی ١٥ی دادگای ئینقلابی تاران، بە تۆمەتی "کۆبوونەوە و تەبانی و هەوڵدان دژی تەناهیی نەتەوەیی" بە ٥ ساڵ زیندان مەحکووم کرا، ئەو حوکمە دواتر لە دادگای پێداچوونەوەی تاران دووبارە پشتڕاست کرایەوە. هەروەها حوکمی ساڵێک زیندانیی تەعلیقیی ناوبراو کە لە ساڵی ٩١ بەهۆی بەشداری لە یارمەتیگەیاندن بە لێقەوماوانی بوومەلەرزەی شاری "ئەهەر" بەسەریدا سەپابوو، خرایە قۆناغی جێبەجێکردنەوە.
ئەو زیندانییە سیاسییە لە ماوەی دەسبەسەرکرانیدا، لەگەڵ دۆسیەسازیی نوێ بەرەوڕوو ببووەوە و لە دۆسیەکەکی دیکەدا، بەهۆی ناڕەزایەتی دەربڕین بە گواستنەوەی زیندانییانی سیاسی بۆ بەندی بان ئەمنییەتی لە زیندانی ڕەجایی شاری کەرەج، لەلایەن لقی ١١٦٢ی دادگای کەیفەریی ٢ی تاران، لە مانگی ڕەزبەری ساڵی ٩٧، بە ٦ مانگ زیندانیی تەعزیری مەحکووم کرابوو.
