سنە؛ کەژاڵ نەسری لەلایەن هێزە ئەمنییەتییەکانەوە دەسبەسەر کرا
سەرلەبەیانیی ئەمڕۆ یەکشەممە ٢١ی سەرماوەز، "کەژاڵ نەسری" تەمەن ٢٦ ساڵ و چالاکی مەدەنیی خەڵکی گوندی "تەنگیسەر" سەر بە ناوچەی ژاوەرۆی سنە، لەلایەن هێزە ئەمنییتەییەکانەوە دەسبەسەر کرا و بۆ شونێکی نادیار ڕاگوێزرا.
هێزە ئەمنییەتییەکان بەبێ نیشاندانی بەڵگەی یاسایی هێرشیان کردووەتە سەر ماڵی ئەو چالاکە کوردە و ناوبراویان دەسبەسەر کردووە.
هەروەها هێزە ئەمنییەتییەکان لە کاتی دەسبەسەرکردنی کەژاڵ نەسری ماڵەکەیان پشکنیوە.
ناوبراو لە بواری "ژینگەپارێزی" چالاکیی هەیە.
هەتا کاتی بڵاوبوونەوەی ئەم هەواڵە، لە هۆکاری دەسبەسەرکردن و تۆمەتە وەپاڵدراوەکان دژی ئەو هاووڵاتییە زانیارییەک لەبەر دەستدا نییە.
هاوکات لەگەڵ دەسبەسەرکردنی ئەو چالاکە کوردە، هاووڵاتییەکی دیکە بە ناوی "فەرهەنگ عێوەزی" کوڕی "محەممەد عەلی"، تەمەن ٣٠ ساڵ و خەڵکی گوندی "تەنگیسەر" سەر بە ناوچەی ژاوەرۆی سنە، لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
