سنە؛ عەبدوڵڵا مەهجوور پاش دەسبەسەرکرانی چارەنووسی هەروا ناڕوونە
سەرەڕای تێپەڕبوونی زیاتر لە ٢ مانگ لە کاتی دەسبەسەرکرانی هاووڵاتییەکی کورد بە ناوی "عەبدوڵڵا مەهجوور"، تەمەن ٥٥ ساڵ و خەڵکی گوندی "مەلقەڕەنی" سەر بە سەقز، لە چارەنووسی ناوبراو زانیارییەک لەبەر دەستدا نییە.
بە وتەی سەرچاوەیەکی ئاگادار، ئەو هاووڵاتییە لە ماوەی دەسبەسەرکرانیدا لە مافی پەیوەندیی تەلەفۆنی، دەسپێڕاگەیشتن بە پارێزەر و چاوپێکەوتن لەگەڵ بنەماڵەکەی بێبەری بووە.
ئەو سەرچاوە ئاگادارە ڕایگەیاند: "هەوڵ و بەدواداچوونەکانی بنەماڵەی عەبدوڵڵا مەهجوور لەم ماوەیەدا بۆ ئاگاداربوون لە چارەنووسی ئەو هاووڵاتییە بێئاکام ماوەتەوە و هەتا ئێستا نەیانتوانیوە پەیوەندیی تەلەفۆنییان لەگەڵ ناوبراو هەبێت".
ڕۆژی پێنجشەممە ٢٠ی خەزەڵوەر، ئەو هاووڵاتییە بەبێ نیشاندانی بەڵگەی یاسایی لەلایەن هێزە ئەمنییەتییەکانەوە دەسبەسەر کراوە و بۆ لێپرسینەوە بۆ یەکێک لە گرتنگە ئەمنییەتییەکانی سنە ڕاگوێزراوە.
هەتا ئێستا لە هۆکاری دەسبەسەرکردن و تۆمەتە وەپاڵدراوەکانی دژی "عەبدوڵڵا مەهجوور" زانیارییەکی ورد لەبەر دەستدا نییە.
