زارا محەممەدی، مامۆستای زمانی کوردی ئیزنی مەرەخەسیی پێ درا
ڕۆژی سێشەممە ١ی خەرمانان، زارا محەممەدی، مامۆستای زمانی کوردی و ئەندامی ئەنجومەنی فەرهەنگی ـ کۆمەڵایەتیی "نۆژین"، لە کانوونی ئیسلاح و تەربییەتی سنە، ئیزنی مەرەخەسیی پێ درا.
بەوتەی سەرچاوەیەکی ئاگادار، زارا محەممەدی بۆ بەشداریکردن لە ڕێوڕەسمی چلەی باوکی، بۆ ماوەی ٥ ڕۆژ ئیزنی مەرەخەسیی پێ دراوە.
زارا محەممەدی، ڕۆژی یەکشەممە ١٦ی گەلاوێژ، پاش تەواوبوونی ماوەی مەرەخەسییەکەی، بۆ کانوونی ئیسلاح و پەرەوەدە، گەڕێندرابووە.
ڕۆژی یەکشەممە ڕێکەوتی ٥ی پووشپەڕ، ئەو ئەندامەی ئەنجومەنی فەرهەنگی ــ کۆمەڵایەتیی "نۆژین" پاش نالەباربوونی دۆخی تەندروستیی باوکی لە کانوونی ئیسلاح و تەربییەتی سنە بۆ یەکەمجار ئیزنی مەرەخەسیی پێدرابوو.
ڕۆژی شەممە ١٨ی بەفرانباری ١٤٠٠، زارا محەممەدی پاش بانگهێشتکردنی بۆ ئیجرای ئەحکامی دادگوستەریی سنە دەسبەسەر کرابوو و بۆ جێبەجێکردنی حوکمی زیندانەکەی بۆ کانوونی ئیسلاح و تەربییەتی سنە ڕاگوێزرابوو.
ڕۆژی یەکشەممە ١٢ی بەفرانباری ١٤٠٠، ئەنجومەنی فەرهەنگی ـ کۆمەڵایەتیی "نۆژین" ڕایگەیاند کە حوکمی پێنج ساڵ زیندانی تەعزیریی "زارا محەممەدی"، مامۆستای زمانی کوردی و ئەندامی ئەنجومەنی فەرهەنگی ـ کۆمەڵایەتیی "نۆژین"، لەلایەن بەرپرسی گشتیی دادگوستەریی پارێزگای سنەوە پشتڕاست کراوەتەوە.
ساڵی ٩٩، دۆسییەی زارا محەممەدی، مامۆستای زمانی کوردی و ئەندامی ئەنجومەنی فەرهەنگی ــ کۆمەڵایەتیی "نۆژین" بۆ پێداچوونەوە ڕەوانەی دیوانی باڵای وڵات کرابوو.
پێش لە جێژنی نەورۆز دۆسییەی ئەو مامۆستایە، بۆ دیوانی باڵای وڵات نێردرابوو.
مانگی ڕێبەندانی ٩٩، حوکمی ١٠ ساڵ زیندانی تەعزیریی "زارا محەممەدی" لە لقی ٤ی دادگای پێداچوونەوەی سنە، بە سەرۆکایەتیی دادوەر "مستەفا تەیاری"، بۆ ٥ ساڵ زیندانی تەعزیری گۆڕدرا.
"زارا محەممەدی" بە تۆمەتی "دانانی دەستە و گرووپ دژ بە نیزام بە مەبەستی تێکدانی ئەمنییەتی نەتەوەیی"، لەلایەن لقی ١ی دادگای ئینقلابی سنەوە ١٠ ساڵ زیندانی بەسەردا سەپابوو.
دوایین دادگاییکردنی "زارا محەممەدی" ڕێکەوتی ٢٧ی ڕێبەندانی ٩٨، لە لقی ١ی دادگای ئینقلابی سنە بە سەرۆکایەتیی دادوەر "سەعیدی" بەڕێوە چووبوو و ڕۆژی سێشەممە ٢٤ی پووشپەڕی ٩٩، حوکمی ١٠ ساڵ زیندانییەکەی بە پارێزەرەکەی ڕاگەیەندرابوو.
ڕۆژی دووشەممە ١١ی سەرماوەزی ٩٨، زارا محەممەدی بە دانانی بارمتەی ٧٠٠ ملیۆن تمەنی بە شێوەی کاتی لە گرتنگە ئازاد کرابوو.
زارا محەممەدی"، ٢ی جۆزەردانی ٩٨، لەلایەن هێزە لیباس شەخسییەکانی وەزارەتی ئیتلاعات لە ماڵەکەی خۆیدا دەسبەسەر کرا و هەتا ١٠ی جۆزەردانی هەمان ساڵ لە شوێنیکی نادیار لە ژووری تاکەکەسیدا بوو و دواتر بۆ زیندانی سنە ڕاگوێزرا و شوێنی ڕاگیرانەکەی بە بنەماڵەکەی ڕاگەیندرا. دواتر زارا محەممەدی، لە ڕەوتی چاوپێکەوتنێک لەگەڵ بنەماڵەکەی، وتبووی کە لە ماوەی ئەو هەشت ڕۆژەدا کە لە ژووری تاکەکەسیدا بووە لەژێر گوشاردا بووە هەتا دانپێدانانی زۆرەملێی لێ وەربگرن.
ڕۆژی چوارشەممە، ٢٧ی خەرمانانی ٩٨، "زارا محەممەدی"، چالاکی مەدەنیی کورد، بەبێ ئاگادارکردنەوەی پێشووی پارێزەرەکان و بنەماڵەکەی، بۆ کۆبوونەوەی دادڕەسی بۆ لقی ١ی دادگای ئینقلابی سنە ڕاگوێزرابوو کە دواتر بەڕێوەچوونی کۆبوونەوەکە دوا کەوت.
ئەنجومەنی فەرهەنگی- کۆمەڵایەتیی "نۆژین"، لە دژکردەوە بەرانبەر بە تۆمەتە وەپاڵدراوەکانی زارا محەممەدی، ڕایگەیاندبوو: " زارا محەممەدی لە کاتێکدا بۆ دانپێدانانی زۆرەملێ لەژێر گوشاردایە کە سەر بە هیچ حیزب و لایەنێکی سیاسی نییە و تەنیا تاوانی، ڕاهێنانی منداڵان بە زمانی کوردییە."
