رێز لە مافی مانگرتوانی بەندكراوی كورد لە بەندیخانەكانی توركیە بگیرێت

12:57 - 1 خەزەڵوەر 2712
مافی مرۆڤ
ئاژانسی كوردپا: كۆمەڵەی مافی مرۆڤی كورد ـ ئوروپا، لە راگەیەندراوێكدا روو بە چەند رێكخراوی نێودەوڵەتی وێڕای پشتیوانی كردن لە داواكاریی بەندكراوانی مانگرتووی كوردی توركیە، داوای لە حكوومەتی توركیە كردووە رێز لە ماف و داواكارییەكان بگرێت.

نوسخەیەك لەو راگەیەندراوە بە ئاژانسی هەواڵدەریی كوردپا گەیشتووە كە ئەمەش دەقەكەیەتی:

بۆ:
رێكخراوی چاودێری مافی مرۆڤ
ریكخراوی لێبوردنی نێودەوڵەتی
رێكخراوی خاچی سوور
پزیشكانی بێسنوور

لە رۆژی ١٢ی سێپتامبری ٢٠١٢ی زایینی (22ی خەرمامانی 1391ی هەتاوی)یەوە ٦٣ بەندكراوی كورد كە بە تاوانی هاوكاری و ئەندامەتی لە پارتی كرێكارانی كوردستان بەند كراون مانیان لە خواردن گرتووە و دوای تێپەڕ بوونی چل رۆژ بەسەر ئەم مانگرتنەدا، رێژەی مانگرتوان هەزاران كەسی تێپەڕاندوە. داواكاریی مانگرتوان لابردنی گوشار و گۆشەگیریی سەر بەڕێز عەبدوڵڵا ئۆجەلان، رێبەری پارتی كرێكارانی كوردستان، و هەروەها مافی خۆ پاراستنی بەندكراوان بە زمانی دایكیە. لە روانگەی كۆمەڵەی مافی مرۆڤی كورد لە ئورووپا‌ هەردوو داواكاریی مانگرتوان بەجێ و رەوان و لە خانەی نێودەوڵەتیی مافی بەندكراواندا جێ دەگرن.

ئەوەی جێی داخە ئەوەیە دەوڵەت و وەزارەتی دادی توركیە بە هیچ شێوەیەك ئامادە نین گوێگری داواكارییەكانی بەندكراوانی سیاسیی كورد بن و بەردەوام زەخت و گوشارەكانییان بۆ سەر بەندكراوان زیاتر دەكەن. لەم نێوەدا دادگاكانی توركیە رێگە بە هاوڵاتییانی كورد نادەن كە بە زمانی دایكی بەرگری لە خۆیان بكەن و ناچار دەكرێن كە بە زمانی توركی وەڵامی پرسیارەكان بدەنەوە. هەروەها لەمەڕ رەوشی بەرێز عەبدوڵڵا ئۆجەلان لە بەندیخانەی ئیمرالیی توركیە كە ماوەیەكی زۆرە رێگە بە پارێزەرانی نەدراوە چاویان پێی بكەوێ و دیار نیە كە بەڕێزیان لە چ بارودۆخێك دان .

بەپێی ئەو راپۆرتانەی بڵاو بوونەتەوە و ئەوانەی بەدەست كۆمەڵەی مافی مرۆڤی كورد لە ئورووپا گەیشتوون، ئێستا لە چەند بەندیخانەیەكی توركیە بەندكراوانی مانگرتوو خراونەتە ناو بەندی تاكەكەسی و هێندێكی دیكەش لەلایەن بەرپرسانی بەندیخانەوە زەخت و گوشاریان دەخرێتە سەر و چەند راپۆرتێكیش لەو بارەوە بڵاو بۆتەوە كەلە بەندیخانەی \"تەكیر داغ\" بەندكراوانی مانگرتوو لێیان دراوە و سووكایەتییان پێكراوە.

ئێمە وەك كۆمەڵەی مافی مرۆڤی كورد لە ئورووپا وێڕای پشتگیری لە داواكارییەكانی مانگرتوان، داوا لە دەوڵەتی توركیە دەكەین كە رێز لە مافی بەندكراوان و ویستە رەواكانیان بگرێ و بە زووترین كات جێبەجێیان بكات.

هەروەها لە هەموو رێكخراوەكانی چاودێر و پارێزەری مافی مرۆڤ، رێكخراوی خاچی سووری نێودەوڵەتی و پزیشكانی بێسنوور داواكارین كە بە زووترین كات سەردانی بەندیخانەكانی توركیە بكەن و لەمەڕ رەوشی بەندكراوان بەگشتی و پێشێل كرانی مافی مانگرتوان بێدەنگ نەبن و بەتایبەتی لێكۆڵینەوەی لەبارەوە‌ بكەن.

هەروەها داوا لە هەموو چالاكان و دڵسۆزانی مەدەنی دەكەین كەلە ئاست ئەم چالاكی و داوخوازییانەی زیندانیانی سیاسی بیدەنگ نەبن و هەڵویست بگرن.

كۆمەڵەی مافی مرۆڤی كورد ـ ئوروپا
17:05 - 5 سەرماوەز 2724
جێبەجێکرانی سزای لەسێدارەدانی مستەفا سووری لە بەندیخانەی کرماشان
11:15 - 5 سەرماوەز 2724
ڕاگواستنی فەرەیدوون سوڵتانی بۆ گرتنگەی ئیتلاعاتی ورمێ و درێژکردنەوەی بڕیاری دەسبەسەرکرانی بۆ ماوەی مانگێکی دیکە
11:10 - 5 سەرماوەز 2724
سنە؛ گرووپێک لە ژنان بە ئامادەبوون لەسەر مەزاری ژنانی کوژراو، توندوتیژیی سیستماتیکیان مەحکووم کرد و جەختیان لەسەر درێژەپێدانی خەبات کردەوە
11:03 - 5 سەرماوەز 2724
سنە؛ سەیران خوسرەوی، چالاکی مەدەنی لەلایەن هێزە ئەمنییەتییەکانەوە دەسبەسەر کرا