دەزگای قەزایی حکوومەتی ئێران میراتی چالاکێکی سیاسیی کوردی زەوت کرد

ئاژانسی کوردپا: دەزگای قەزایی حکوومەتی ئێران، میراتی چالاکێکی سیاسیی کوردی خەڵکی شاری سەقز، کە ئیستا لە وڵاتی ئاڵمان دەژیت، زەوت کرد.

بەپێی هەواڵی گەیشتوو بە ئاژانسی هەواڵدەریی کوردپا، دەفتەری دادگای ئەسڵی ٢٩ی یاسای بنەڕەتیی پارێزگای سنه، دەستی بەسەر میراتی چالاکێکی سیاسیی کورد بە ناوی \"فاتح ساڵحی\"، تەمەن ٤٠ ساڵ، کوڕی \"عەلی\"، خەڵکی شاری سەقز کە ئێستا لە وڵاتی ئاڵمان دەژیت، داگرت.

سەرچاوەیەکی ئاگادار وێڕای پشتڕاستکردنەوەی ئەوە هەواڵە ڕایگەیاند: \"هۆکاری زەوتکردنی میراتی ئەو چالاکە سیاسیییە کوردە لە لایەن دەفتەری دادگای ئەسڵی ٤٩ی یاسای بنەڕەتیی پارێزگای سنە، بە هۆی چالاکییە سیاسییەکانی ناوبراو دژی ڕێژیمی ئێران بووە\".

دەفتەری دادگای ئەسڵی ٤٩ی یاسای بنەڕەتیی پارێزگای سنە بە ناردنی ئاگادارنامەیەک بۆ ئەو چالاکە سیاسییە کوردە، ڕایگەیاندووە: \"ناوبرا دەبا ڕێکەوتی ٢٣ی جۆزەردانی ئەمساڵ خۆی بەو دەفتەرەی دادگا ناساندبا و بە وەرگرتنی \"نسخه ثانی و ضائم دادخواست\" لە کاتی دیاریکراودا بۆ بەدواداچوون لە دادگا ئامادە بێت یا لایحەی داکۆکی لەخۆی بۆ دادگا بنێرێت، لە غەیری ئەوەدا دادگا بە شێوەی \"غیاب\"ی بڕیاری پێویست دەدا\".

ئەو چالاکە سیاسییە کوردە لە ئەکتەری \"تئاتر\" لە شاری سەقز بووە، ساڵی ١٣٨٥ی هەتاوی بە هۆی گوشارەکانی حکوومەتی ئێرانەوە زێدی خۆی بەجێهێشت و لە دەرەوەی وڵاتدا سەرقاڵی چالاکیی سیاسی، ڕۆژنامەنووسی و هونەریی بووە.

ناوبراو ئەندامی حیزبی دێموکراتی کوردستان ئێران بووە، کە ئەو حیزبە بە یەکێک لە حیزبە سەرەکییەکانی دژبەری حکوومەتی ئێران بە ئەژمار دێت.