بەرەی یەکگرتووی کورد سەپاندنی بڕیاری زیندانی بۆ "زارا محەممەدی" به توندی ئیدانه دەکات
بەرەی یەکگرتووی کورد ڕاگەیەندراوێکی ئێعترازیی سەبارەت بە بڕیاری بەندکردنی "زارا محەممەدی" بڵاو کردەوە.
دەقی ئەم ڕاگەیەندراوە بەم چەشنەیە:
ڕاگەیەندراوی ئێعترازی بەرەی یەکگرتووی کورد به بڕیاری بەندکردنی خاتوو زارا محەممەدی.
هاونیشتمانییان و هەڵسوڕاوانی مەدەنی و ڕێکخراوە کۆمەڵایەتییەکان!
زمانی دایکی و خۆشەویستییەکەی و هەوڵ و تەقەلا بۆ گەشه و نەشەی، بابەتێکی دەروونی و هەستی و ژیرانەیه.
له دەستوور و یاسای بنەڕەتیدا، هەر چەندە ناتەواو، بەڵام باسی خوێندن و فێرکاری به زمانی دایکی کراوه و وەک مافێکی سروشتی به فەرمی ناسێندراوه.
بەڵێ لە بارودۆخی هەستیار و نالەباری ئابووری، سیاسی و کۆمەڵایەتی و کێشەی دەرەکی و گەمارۆی گشتی و بابەتی وزەی ناوکی و بەرجام و گشت تەنگژەکانی پێوەندییه دەرەکییەکان له بواری ناوچەیی و نێودەوڵەتی، کێشەی ناوخۆیی وەک قەیرانی ئابووری و گرانی و هەژاری و بێکاری و ئێعتیاد و تەڵاق و منداڵانی کار و دەیان گرفت و کێشەی بچووک و مەزنی تر که هەنووکه بەرۆکی دەوڵەت و میللەتی گرتووه، ئەوەی که بووەته هۆی دڵەڕاوکێی بەرپرسان و کاربەدەستانی ئەم وڵاتە، هەوڵ و چالاکیی بێ مەعاشی کیژۆڵەیەکی پاک و بێگەرده که لهنێوان گشت ئەم هەڵڵا و تەنگەژانەدا قۆڵی هەڵماڵیوه و ئەوەی که ساڵەها لەمەوبەر دەبوا به بودجەی دەوڵەت و به فەرمی له بەرنامەی فێرکاری و پەروەردەدا خزێندرابا، به تەنیا دەیکات. سپاسنامه و ڕێزنامەگەلێک که دەبوا لەم دونیا ئاوەژوەدا پێی درابا، هاتوچۆ بۆ دادگا و سەرکۆنه و زیندان کردنە. بەڵێ دونیایەکی بەراوژوویه و دز و جەرده و گەندەڵەکان له دەرێ ئازادن و کۆتره هەست پاک و بێگەردەکان له‌نێو بەند و بەندیخانه‌دان.
بەرەی یەکگرتووی کورد دادگاییکردن و سەپاندنی بڕیاری زیندانی بۆ خاتوو زارا محەممەدی و هەر کەسێکی تر به‌هۆی وانەگوتنەوەی زمانی دایکی به منداڵانی ئەم خاکەی به توندی ئیدانه دەکات و داواشی له بەرپرسانی پێوەندیدار و دەزگای داد هەیه هەتا پێداچوونەوەیەکی ئەرێنی لەمەڕ ئەم شێوه دۆسیەیانە بگرنه بەر و باسی فێرکاریی خۆبەخشانەی زمانی دایکی نەک له خانەی تاوان و سزا، بەڵکوو بخەنه خانەی هاندان و گەشەی پێ بدەن.
بەرەی یەکگرتووی کورد
١٤ی بەفرانباری ١٤٠٠ی هەتاوی
