بوومەلەرزە ناوچەی هەورامانیشی گرتەوە

كوردپا: پاش ئەوەی كە شەوی دووشەممە لەسەر سێشممە بوومەلەرزەیەك شاری سلێمانی هەژاند، سەرلەبەیانیی ئەمڕۆش بوومەلەرزەیەكی دیكە ناوچەی هەورامانیشی گرتەوە.

بەڕێوەبەرایەتیی كەشناسیی سلێمانی رایگەیاند، كاژێر 9:2 سەرلەبەیانیی ئەمڕۆ سێشەممە بوومەلەرزەیەك بە گوڕی 6/3 بە پێوەری ریشتەر ناوچەی هەورامان لە هەرێمی كوردستانی هەژاندووە.

هەتا ئێستا لەمەڕ زیانە گیانی و مادییەكانی ئەو بوومەلەرزەیە زانیارییەك بڵاو نەكراوەتەوە.

شەوی رابردوو كاتژمێر 8:55 خولەك بە كاتی ناوخۆیی هەرێمی كوردستان بوومەلەرزەیەك بە هێزی 5/2 بە پێوەری ریشتەر شاری سلێمانی هەژاند كە هیچ زەرەرێكی گیانی و مادی بەدواوە نەبووە.

بەپێی زانیارییەكانی كەشناسیی سلێمانی لە ماوەی مانگێكدا 13 جار بوومەلەرزە لە سلێمانی تۆمار كراوە كە لەبەر كەمی پلەكانیان رانەگەیەنراون‌.