بانە؛ گوشاری ستادی خەبەریی ئیدارەی ئیتلاعات بۆ سەر بەڕێوەبەرانی کاناڵە تێلێگرامییەکان
ستادی خەبەریی ئیدارەی ئیتلاعات لە نوێترین حاڵەتدا، گوشاری بۆ سەر بەڕێوەبەرانی کاناڵە تێلێگرامییەکان لە شاری بانە، کە هەواڵی پەیوەندیدار بە کوژران و برینداربوونی کۆڵبەران ڕووماڵ دەکەن، زیاد کردووە.
سەرچاوەیەکی ئاگادار لەو بارەیەوە بە کوردپای ڕاگەیاندووە: "لە ماوەی ڕۆژی ڕابردوودا و پاش کوژران و بریندارکردنی دوو برای کۆڵبەر بە ناوەکانی سەعدوڵڵا و عەلی یوونسی لە شاری بانە، ستادی خەبەریی ئیدارەی ئیتلاعاتی ئەو شارە، چەند جار لەگەڵ کاناڵە تێلێگرامییەکانی وەک ڕووداو بانە، پرسە و سەرەخۆشییەکانی بانە وبانە ٢٤ پەیوەندیی گرتووە و هوشداریی بە ئەوان داوە کە لە بڵاوکردنەوەی هەواڵی پەیوەندیدار بە کۆڵبەران خۆیان ببوێرن".
ئەو سەرچاوەیە هەروەها ئەوەشی خستەڕوو: "پێشتر پۆلیسی فەتا لەو پەیوەندییەدا هوشداریی بەو کاناڵانە دابوو".
ئێوارەی ڕۆژی شەممە ١ی گەلاوێژ، کۆڵبەرێک بە ناوی "سەعدوڵڵا یوونسی" بەهۆی تەقەی هێزە نیزامییەکانی حکوومەت لە سنووری بانە گیانی لەدەست دا و کۆڵبەرێکی دیکە بە ناوی "عەلی یوونسی" بە سەختی بریندار بوو.
هێزە نیزامییەکانی حکوومەت ئەو دوو کۆڵبەرە کە بران، بەبێ ئاگادارکردنەوەی پێشوو و لە سنووری "ماڵتە و گڵەسوورە"ی بانە داوەتە بەر دەستڕێژی گولـلە.
