بانگهێشت كرانی چالاكێكی مەزهەبیی بۆ ئیدارەی ئیتلاعاتی كامیاران

ئاژانسی كوردپا: لە دوو رۆژی یەكەمی حەفتەی ناسراو بە \"وەحدەت\" یەكێك لەئەندامانی مەكتەب قورئانی كوردستان لەلایەن هێزە ئەمنییەكانەوە لێپێچینەوەی لەگەڵدا كراوە.

بەپێی هەواڵی ئاژانسی هەواڵدەریی كوردپا، ئیدارەی ئیتلاعاتی شارستانی كامیاران لە رۆژەكانی یەكشەممە و دووشەممەی ئەم حەفتەیەدا هاووڵاتییەكی كوردی بەناوی عەلی ئەكبەر كەمانگەر بانگهێشت كردووە.

بانگهێشتی ئەو ئەندامەی رەوتە ئیسلامییەی كوردستان بە هۆی پرسیار كردن سەبارەت رێوڕەسمی لەدایك بوونی (پێغەمبەری ئیسلام) لە ئیمام جومعەی شارستانی كامیاران بووە.

سەرچاوەیەكی ئاگادار باسی لەوە كرد، ئەو چالاكە مەزهەبییە بۆ ماوەی زیاتر لە ٤ كاتژمێر لەگرتنگەی ئیدارەی ئیتلاعاتدا سووكایەتی پێكراوە و تەنانەت لێكۆڵەرەكە لێشیداوە.

ئەو بانگهێشت كردنە لەحاڵێكدایە كە ئەم حەفتەیە بەناوی \"حەفتەی یەكیەتی شیعە و سوننی\" لەلایەن دەسەڵاتدارانی ئێران و شەخسی خومەینیەیوە ناودێڕ كراوە و ئەو هەڵسوكەوتەی هێزە ئەمنیەتیەكان لەو كات و ساتەدا جێگای تێڕامانە.

مەكتەب قورئانی كوردستان كە لە قوتبی و پەێڕەوانی ئەحمەد موفتی زادە پێكهاتووە، رەوتێكی دینییە كە لەكوردستان و ناوچە سوننی نشینەكانی ئێران چالاكی دەكات.

عەلی ئەكبەر كەمانگەر ماوەی دوو ساڵ لەمەوبەریش لە دێگولان دەستبەسەر و سێ‌مانگ و یەك رۆژ زیندان سزا درابوو.