مەهاباد؛ کوژرانی "سەید سیاوەش ئەلەک" لاوی کورد لەلایەن هێزە خۆجێییەکانی سپاوە، لە دوای ناڕەزایەتیی خەڵک، باوکی بانگ کرا و تەرمەکەی بە هەڕەشە و وەرگرتنی بەڵێننامە ڕادەست کرایەوە
١١ی پووشپەڕی ١٤٠٥؛ ئێوارەی ڕۆژی ڕابردوو، گرووپێک لە چەکدارە خۆجێییەکانی سپا ناسراو بە "جاش" لەگەڵ گرووپێک لە لاوانی کوردی سەر بە بنەماڵەی "سەیدەکان"ی مەهاباد دەرگیر بوون و بە زەبری چەقۆ لاوێکی کورد بە ناوی "سەید سیاوەش ئەلەک"یان کوشت و چوار لاوی دیکەشیان بەسەختی بریندار کرد.
ئەم ڕووداوە بووە هۆی کۆبوونەوە و ناڕەزایەتیی خەڵک لە بەردەم نەخۆشخانەی مەهاباد، و دامەزراوە ئەمنییەکان بۆ ڕێگریکردن لە پەرەسەندنی ناڕەزایەتییەکان، دوای بانگهێشتکردن، هەڕەشە و وەرگرتنی بەڵێننامە لە بنەماڵەکەی، تەرمەکەیان ڕادەست کردەوە. هەروەها سەرەڕای داخرانی زۆربەی شەقامەکانی شار لەلایەن حکوومەتەوە، ڕێوڕيسمی بەخاکسپاردنی ناوبراو بە بەشداریی بەربڵاوی خەڵک بەڕێوە چوو.
سەرچاوەیەکی ئاگادار وێڕای پشتڕاستکردنەوەی ئەم هەواڵە بە «کوردپا»ی ڕاگەیاند؛ شەوی ڕابردوو، ١٠ی پووشپەڕی ١٤٠٥، گرووپێک لە چەکدارە خۆجێییەکانی سپا ناسراو بە «جاش» لە نزیک بانکی تیجارەتی شار، لەگەڵ گرووپێک لە لاوانی کوردی سەر بە بنەماڵەی «سەیدەکان»ی مەهاباد دەرگیر بوون و بە زەبری چەقۆ هێرشیان کردە سەریان.
"سەید سیاوەش ئەلەک» کە لەلایەن کەسێک بە ناوی «نیما تەیمووری» بەسەختی بریندار کرابوو، دوای چەند کاتژمێرێک گیانی لەدەست دا.
ئەم سەرچاوەیە زیادی کرد: «نیما تەیمووری» کوڕی جەعفەر، «کۆمار ئاریا» کوڕی لوقمان و «فەرعان پەزیرە» کە لە چەکدارە خۆجێییەکانی سپا ناسراو بە «جاش» و لە عەشیرەتی «مەنگوڕ»ن، لەگەڵ گرووپێک لە لاوانی کوردی بنەماڵەی «سەیدەکان»ی مەهاباد بەشەڕ هاتوون و بە زەبری چەقۆ «سەید سیاوەش ئەلەک» کوڕی سەید عومەریان کوشتووە.
هەروەها «زانا ئازادمەنش» کوڕی سەید سولەیمان، «مەنسوور» و «عیرفان» کوڕی سەید سابیر و «وەهاب کەریمی» کوڕی سەید تاھیر بەسەختی بریندار بوون.
بە وتەی ئەم سەرچاوەیە، چەکدارە خۆجێییەکانی سپا دوای ئەم کارە، بۆ دروستکردنی کەشی و تۆقاندن لە شەقامەکاندا، ماشینی خەڵکیان ڕادەگرت و بە بێڕێزییەوە هەڵسوکەوتیان لەگەڵ هاووڵاتییان دەکرد.
لە دوای ئەم هێرشە و گواستنەوەی بریندارەکان بۆ نەخۆشخانە، خەڵکی مەهاباد لە بەردەم نەخۆشخانە کۆبوونەوە و دژ بە چەکدارە خۆجێییەکانی سپا ناسراو بە «جاش» دروشمیان وتەوە.
لە درێژەدا، فەرماندار و فەرماندەی هێزی ئینتزامی ڕایانگەیاند کە بکوژەکە خۆی ڕادەست کردووە؛ لەگەڵ ئەوەشدا، خەڵک لە کۆبوونەوە و ڕێپێوانەکەیان لە چوارڕێانی ئازادی بەردەوام بوون و دژ بە «جاش»ەکان دروشمیان دا.
بڕیار بوو تەرمی «سەید سیاوەش ئەلەک» بە ئامادەبوون و بەڕێکردنی خەڵک بەخاک بسپێردرێت، بەڵام بەیانیی ئەمڕۆ پێنجشەممە ١١ی پووشپەڕی ١٤٠٥، باوکی ناوبراو «سەید عومەر ئەلەک» بانگی ئیدارەی ئیتلاعاتی مەهاباد کرا و بەڵێننامەی پێ واژۆ کرا کە دەبێ ڕێوڕەسمی بەخاکسپاردنەکە بەبێ هیچ جۆرە کۆبوونەوە و ناڕەزایەتییەک بەڕێوە بچێت؛ ئەگەر بە پێچەوانەوەی ئەمە بێت بەرپرسیارێتیی هەر لێکەوتەیەک لە ئەستۆی ئەو دەبێت.
بە وتەی ئەم سەرچاوەیە، مامۆستایانی ئەمنی بەسەختی هەڕەشەیان لێ کردبوو کە ئەگەر بەخاکسپاردنی کوڕەکەی ببێتە هۆی بەردەوامیی کۆبوونەوەکان لە شاردا، تەرمەکەی ڕادەست ناکەنەوە و تا ئەو کاتەی بەڵێننامەکەی واژۆ نەکرد، بەڵگەی پزیشکی دادوەری و تەرمی کوڕەکەیان بە بنەماڵەکەی نەدایەوە.
هەروەها ئەمڕۆ هێزە حکوومەتییەکان مەیدانە سەرەکییەکانی شاری مەهابادیان، لە شارەوانییەوە تا فەلەکەی سەردەشت، داخستبوو.
زۆربەی خەڵکیشبەە نیشانەی ناڕەزایەتی بەرانبەر بەم ڕووداوە دووکانەکانی خۆیان داخرابوو و دەستیان دابووە مانگرتن.
لەگەڵ ئەوەشدا، ژمارەیەکی زۆر لە هاووڵاتییان لە رێوڕەسمی بەخاکسپاردنی «سەید سیاوەش ئەلەک»دا بەشدار بوون و تەرمەکەیان بە دروشمی «شەهید نامرێ» بەڕێ کرد.
تەرمی «سەید سیاوەش ئەلەک»، بەیانیی پێنجشەممە ١١ی پووشپەڕی ١٤٠٥ لە گۆڕستانی مەهاباد بەخاک سپێردرا.
