ورمێ؛ دەسبەسەرکرانی سەرەڕۆیانە و ناڕوونیی چارەنووسی حەدیس حەقیقی، بلاگێری کورد
٢٢ی خاکەلێوەی ١٤٠٥؛ سەرەڕای تێپەڕبوونی زیاتر لە یەک مانگ لە کاتی دەسبەسەرکرانی حەدیس حەقیقی، بلاگێری ٢١ ساڵەی کوردی خەڵکی ورمێ، هیچ زانیارییەکی ڕوون لەبارەی چارەنووس و شوێنی ڕاگرتنی، لەبەردەست نییە.
بە وتەی سەرچاوەیەکی ئاگادار کە بە کوردپای ڕاگەیاند، هێزە ئەمنییەتییەکان لە شەودا و بەبێ بەڵگەی یاسایی، هێرشیان کردووەتە سەر ماڵی باوکی ئەم بلاگێرە و لەگەڵ باوکی دەسبەسەر کردووە.
ئەم سەرچاوەیە زیادیکرد: حەدیس حەقیقی و باوکی لە کاتی دەسبەسەرکرانەوە تا ئێستا لە مافی دەسپێڕاگەیشتن بە پارێزەر و چاوپێکەوتن لەگەڵ بنەماڵەکەیان بێبەش کراون.
هەروەها وتیشی: لاپەڕەی کەسیی ئینستاگرامی ئەم بلاگێرە بە بڕیاری دادگا داخراوە.
بەپێی ئەم سەرچاوەیە، هەوڵەکانی بنەماڵەی حەقیقی بۆ ئاگاداربوون لە چارەنووسی حەدیس و باوکی بێئاکام بووە.
ئەو سەرچاوەیە ئاماژەی بەوەدا: لە کاتی جەنگی نێوان ئێران و ئەمریکا – ئیسرائیل، ژمارەیەک لە بلاگێرە کوردەکانی ورمێ بانگهێشت کراون بۆ ناوەندە ئەمنییەتییەکان و دوای تەواوبوونی لێکۆڵینەوەکان، ئامرازە ئەلیکترۆنییەکانیان لێی وەرگرتن و مافی چالاکی لەسەر تۆڕە کۆمەڵایەتییەکانیان لێی قەدەغە کردوون.
هەتا کاتی بڵاوبوونەوەی ئەم هەواڵە، سەبارەت بە هۆکاری دەسبەسەرکران و تۆمەتە وەپاڵدراوەکان دژی حەدیس حەقیقی زانیارییەک لەبەر دەستدا نییە.
