نەغەدە؛ دەسبەسەرکرانی سەرەڕۆیانەی شەش هاووڵاتیی کورد لەلایەن هێزە ئەمنییەتییەکانەوە و ناڕوونی چارەنووسیان
٦ی پووشپەڕی ١٤٠٤؛ لە ماوەی ڕۆژانی ٣ و ٥ی پووشپەڕی ١٤٠٤دا، شەش هاووڵاتیی کورد بە ناوەکانی ئەمین باشوکی، کاوە قادری، ڕەحمان خاڵخانی، فەرهاد کەریمی، سامان کاکەمەمی و سامان سەید مەحموودیان کە هەموویان خەڵکی نەغەدەن لەلایەن هێزە ئەمنییەتییەکانەوە دەسبەسەر کران و بۆ شوێنێکی نادیار ڕاگوێزران.
بە وتەی سەرچاوەیەکی ئاگاداری کوردپا، "سامان (سەلام)سەید مەحموودیان تەمەن ٣٠ ساڵ و سامان کاکەمەمی، هاووڵاتییانی کوردی خەڵکی نەغەدە ڕۆژی پێنجشەممە ٥ی پووشپەڕی ١٤٠٤ لە دەرەوەی ماڵ (سامان سەید مەحموودیان لە شوێنی کارەکەی خۆی و سامان کاکەمەمی لە نێو شار)، بە بێ بەڵگەی یاسایی لەلایەن هێزە ئەمنییەتییەکانەوە دەسبەسەر کران و بۆ شوێنێکی نادیار ڕاگوێزران.
هەروەها ڕۆژی سێشەممە ٣ی پووشپەڕی ١٤٠٤، ئەمین باشوکی، کاوە قادری، ڕەحمان خاڵخانی و فەرهاد کەریمی (ناسراو بە فەرهاد کانادا) هاووڵاتییانی کوردی خەڵكی نەغەدە بە بێ بەڵگەی یاسایی لەلایەن هێزە ئەمنییەتییەکانەوە دەسبەسەر کران و بۆ شوێنێکی نادیار ڕاگوێزران.
سەرچاوەی ئاگاداری کوردپا دەڵێ، هێزە ئەمنییەتییەکان هەندێ کەلوپەلی کەسیی ئەم هاووڵاتییانە وەک مۆبایل و لەپتابیان بە بێ بەڵگەی یاسایی لەگەڵ خۆیان بردووە.
هەتا کاتی بڵاوبووەوەی ئەم هەواڵە، سەبارەت بە هۆکاری دەسبەسەرکران، تۆمەتە وەپاڵدراوەکان و چارەنووسی ئەم هاووڵاتییانە سەرەڕای بەدواداچوونی بنەماڵەکانیان زانیارییەک دەست نەکەوتووە.
