سنە؛ کۆبوونەوەی لێپرسینەوەی کامران ساختمانگەر، چالاکی کرێکاری بەڕێوە چوو

ڕۆژی یەکشەممە ٢٨ی بانەمەڕی ١٤٠٤، کۆبوونەوەی لێپرسینەوەی کامران ساختمانگەر، چالاکی کرێکاری و بەندکراوی سیاسیی پێشوو لە لقی ٢ی لێپرسینەوەی دادسەرای گشتی و ئینقلابی سنە بەڕێوە چوو.
لەم کۆبوونەوەیەدا، ئەم چالاکە کرێکارییە لە تۆمەتەکانی "ئەندامەتی لە کۆمەڵە، کۆبوونەوە تەبانی و بێڕێزی بە ڕێبەری" بێتاوان ناسرا و دۆسییەکەی بە تۆمەتی "چالاکی تەبلیغی دژی نیزام" ڕەوانەی دادگا کرا.
ڕۆژی سێشەممە ٢١ی ڕەشەمەی ١٤٠٣، کامران ساختمانگەر، بە دانانی بارمتە لە بەندیخانەی ئەم شارە ئازاد کرا.
ئەم چالاکە کرێکارییە پاش کۆتاییهاتنی قۆناغەکانی لێپرسینەوە لە یەکێک لە گرتنگە ئەمنییەتییەکانی سنەوە بۆ بەندیخانەی ئەم شارە ڕاگوێزرابوو.
ڕۆژی چوارشەممە ١٧ی ڕێبەندانی ١٤٠٣، ئەم چالاکە کرێکارییە لە شەقامی "جامی"ی شاری سنە بە بێ بەڵگەی دادوەری لەلایەن هێزە ئەمنییەتییەکانەوە دەسبەسەر کرابوو.
ڕۆژی دووشەممە، ٦ی سەرماوەزی ١٤٠٢، کامران ساختمانگەر، چالاکی کرێکاری، پاش ئامادەبوون لە لقی ٤ی جێبەجێکاری سزاکانی سنە، دەسبەسەر و بە مەبەستی جێبەجێکرانی سزاکەی ڕەوانەی زیندانی سنە کرا.
کامران ساختمانگەر، لە لقی یەکی دادگای ئینقلابی سنەدا، لە تۆمەتی "کۆبوونەوە و تەبانی" بێتاوان ناسرابوو و بە تۆمەتی "چالاکیی تەبلیغی لە ڕێگەی تۆڕە کۆمەڵایەتییەکان و وتووێژ لەگەڵ کاناڵە تلویزیۆنییەکان" بە ٣ مانگ زیندانی تەعزیری و سزای نەختی مەحکووم کرابوو.
دادگا بە پشتبەستن بە ماددە یاساییەکان و دۆخی جەستەیی و بەڵگەی پزیشکیی ئەم چالاکە کرێکارییە لە دۆسییەکەیدا، ٣ مانگ زیندانی تەعزیریی ناوبراوی بۆ سزای نەختی گۆڕی و ناوبراوی سەرجەم بە ٣٤ میلیۆن تمەن سزای نەختی مەحکووم کرد.
ئەم چالاکە کرێکارییە، پێشتر بە تۆمەتی "ئەندامەتی لە کۆمەڵە و چالاکیی تەبلیغی دژی نیزام" بە ٥ ساڵ زیندانی تەعزیری مەحکووم کرابوو و پاش کەمکردنەوەی ئەم حوکمە بۆ ٢٨ مانگ، لە ڕێکەوتی یەکی خاکەلێوەی ١٤٠٢دا، لە زیندانی سنە ئازاد کرابوو.