سەرکوتی نەورۆز لە سەڵماس؛ ناوندە ئەمنییەتییەکان و هێزە خۆجێییەکانی سەر بە حکوومەت لە هەوڵێکی هاوبەشدا بە بیانوی "مانگی ڕەمەزان" پێشیان بە بەڕێوەچوونی ڕێوڕەسمە نەورۆزییەکان گرت
لە ماوەی ڕۆژانی کۆتایی ڕەشەمەی ١٤٠٣دا لە کاتێکدا کە کۆمەڵگەی فەرهەنگیی سەڵماس بڕیاری بەڕێوەبردنی ڕێوڕەسمە نەورۆزییەکانی دابوو، ناوەندە ئەمنییەتییەکان بە هاوکاریی ژمارەیەک لە "پێشنوێژەکانی هەینی" و "نوێنەری شۆرای شاری سەڵماس" کە سەر بە حکوومەت و ناوەندە ئەمنییەتییەکانن، لە داواکارییەکدا ڕوو لە فەرمانداریی شاری سەڵماس خوازیاری پێشگرتن لە بەڕێوەچوونی ڕێوڕەسمە نەورۆزییەکان بە بیانووی "مانگی ڕەمەزان" و دواخستنی ئەم ڕێوڕەسمانە بۆ دوای کۆتاییهاتنی مانگی ڕەمەزان بوون و بەم جۆرە پێشیان بە بەڕێوەچوونی ڕێوڕەسمە نەورۆزییەکان لە سەڵماس گرت.
کوردپا لە ڕاپۆرتێکدا بە پشتبەستن بە بەڵگە و زانیاریگەلێک کە بە دەستی گەیشتوون، پەرژاوەتە سەر شێوەی پێشگرتن لە ڕێوڕەسمە نەورۆزییەکان لە سەڵماس کە لە ڕێگەی ناوەندە ئەمنیەتییەکان و کەسانی سەر بە ئەوانەوە پێشیان پێ گیراوە.
بەو شێوەیە کە ژمارەیەک لە "پێشنوێژەکان" و "نوێنەری شۆرای سەڵماس" کە سەر بە حکوومەت و ناوەندە ئەمنییەتییەکانن، لە داواکارییەکدا ڕوو لە فەرمانداریی شاری سەڵماس خوازیاری پێشگرتن لە بەڕێوەچوونی ڕێوڕەسمە نەورزۆییەکان بە بیانووی مانگی ڕەمەزان" بوون و ئەمەش بووە هۆی ئەوەی کە ڕێوڕەسمە نەورۆزییەکان پاش قەبووڵکردنی ئەم داواکارییە لەلایەن فەرماندارییەوە، بەڕێوە نەچن.
بە وتەی سەرچاوەیەکی ئاگاداری کوردپا، لە ماوەی ڕۆژانی ڕابردوودا، کۆمەڵگەی فەرهەنگیی سەڵماس ئەیویست لە ناوچەی بەنداوی "نەزەرئاباد"ی ئەم شارەدا ڕێوڕەسمی نەورۆز بەڕێوە ببات، بەڵام بەرەوڕووی دژایەتیی توندی ناوەندە ئەمنیەتییەکان بوویەوە. ئەم ناوەندانە بە هاوکاریی هەندێ کەسی سەر بە حکوومەت و هێزە ئەمنییەتییەکان لەوانە سپای پاسداران، لە بەرانبەر بەڕێوەچوونی ڕێوڕەسمەکان خۆڕاگرییان کردووە و لە سێناریۆیەکدا بە بیانووی "مانگی ڕەمەزان" ژمارەیەک لە "پێشنوێژەکانی هەینی" و "نوێنەری شۆرای شاری سەڵماس" کە سەر بە حکوومەت و ناوەندە ئەمنییەتییەکانن، داوایان لە فەرمانداریی سەڵماس کردووە کە پێش بە بەڕێوەچوونی ڕێوڕەسمەکانی نەورۆز بگرێ و ئەمەش بووە هۆکار کە ڕێوڕەسمەکانی نەورۆز پاش قەبووڵکرانی ئەم داواکارییە لەلایەن فەرماندارییەوە، چیدیکە بەڕێوە نەچن و بکەونە دوای مانگی ڕەمەزان.
سەرچاوەی ئاگاداری کوردپا دەڵێ؛ ئەم هەوڵە لەکاتێکدایە کە ڕێوڕەسمە نەورۆزییەکان لە کوردستان بە گشتی لە ناوەڕاستی ڕەشەمە هەتا سەرەتاکانی خاکەلێوە بەڕێوە دەچن و گۆڕینی ئەو کاتە دەتوانێ لە گرینگییەکەیان کەم بکاتەوە چونکە پێوەندییەکانی خەڵک لەگەڵ سروشت، نەریتەکان، هاودەنگیی کۆمەڵایەتی و شوناسی فەرهەنگیی خەڵک دەخاتە ژێر کاریگەرییەوە و دەبێتە هۆی کەمبوونەوەی مانای جێژنەکان.
لەو بەڵگەیەدا کە بە دەستی کوردپا گەیشتووە لەسەر داوا و بە واژۆی ژمارەیەک لە "پێشنوێژەکان" و "نوێنەری شۆرای شاری سەڵماس" داوا کراوە کە بە هۆی هاوکاتبوونی ڕۆژانی نەورۆز لەگەڵ مانگی ڕەمەزان و ڕۆژانی قەدر، پێش بە "بێڕێزی بەم ڕۆژانە" بگیردرێت و بەڕێوەچوونی رێوڕەسمەکانی نەورۆز بۆ دوای مانگی ڕەمەزان دوا بخرێن.
لە بەشێکی دیکەدا داوا کراوە کە نەورۆز بە شێوەی "جێژنێکی نەتەوەیی" بەڕێوە بچێت و پێش بەوە بگیردرێ کە ببێتە بیانوویەک بۆ "دووبەرەکی" و ئیزنی "کەڵئاوەژوو وەرگرتنی دوژمن" نەدەن.
ئەم بەڵگەیە داواکاری و واژۆی ١٥ کەس لەوانە ١٢ پێشنوێژی هەینی و فێرخوازی ئایینیی گوندەکان و شاری سەڵماس، نوێنەری کوردی شۆرای شاری سەڵماس و ٣ کەسی دیکە (توندئاژۆیەکی مەزهەبی، مۆرەیەکی دیاری بڵاوکردنەوەی ماددەی هۆشبەر و کەسێکی نەناسراو بە ناوی "یەعقووب") لەسەرە کە ناو و زانیارییەکانیان بەم چەشنەیە:
ڕەحیم عوسمانزادە، پێشنوێژی هەینیی سوننە مەزهەبی سەڵماس
ئەمیر جەعفەرزادە، نوێنەری کوردی شۆرای شاری سەڵماس
ئەسەد خالیدی، پێشنوێژی هەینیی سوننە مەزهەبی گوندی پتەویر و "ئەندامی سپای پاسداران"
سەعید محەممەدیان، پێشنوێژی هەینیی سوننە مەزهەبی شاری تازە شار
محەممەدئەمین ئەنساری، پێشنوێژی هەینیی سوننە مەزهەبی هەفتەوان و "توندئاژۆ و لە دژبەرانی بزووتنەوەی ژن، ژیان، ئازادی"
عەباس یوونسزادە، پێشنوێژی هەینیی سوننە مەزهەبی گوندی لەشگران
مستەفا مستەفازادە، پێشنوێژی هەینیی سوننە مەزهەبی گوندی چەهریق
مەحموود ئەنساری، فێرخوازی ئایینی و مامۆستای سوننە مەزهەب و "خاوەن ڕوانگەی ڕادیکاڵ بەرانبەر بە ژنان"
ئومید یوونسزادە، پێشنوێژی هەینیی سوننە مەزهەبی چوار یاری نەبی
بەهمەن حاجیزادە، پێشنوێژی هەینیی سوننە مەزهەبی گوندی هەبان ئاوا
داوود شەهبازی، پێشنوێژی هەینیی سوننە مەزهەبی گوندی چەهریق
بەهمەن خالیدزادە، پێشنوێژی هەینیی سوننە مەزهەبی گوندی هێمەت ئاوا
سەید مێهدی حوسێنی، "لە مۆرە سەرەکییەکانی بڵاوکردنەوەی ماددەی هۆشبەر لە سەڵماس"
مستەفا جەهان فەرزاد، "توندئاژۆی مەزهەبی"
یەعقووب (نەناسراو)
