بەردەوامیی دەسبەسەرکران و ناڕوونیی چارەنووسی ئیدریس دادڕەس
ئیدریس دادڕەس، هاووڵاتیی خەڵکی گوندی "سەردۆش"، دانیشتووی مەریوان دەسبەسەرە و ناڕوونیی چارەنووسی ئەم هاووڵاتییە، نیگەرانیی بنەماڵە و کەسانی نزیکی ناوبراوی لێ کەوتووەتەوە.
بە وتەی سەرچاوەیەکی ئاگادار، ئەم هاووڵاتییە کوردە لە ماوەی دەسبەسەرکرانیدا تەنیا یەک جار لەگەڵ بنەماڵەکەی پێوەندیی کورتی تلفۆنیی هەبووە.
ئەم سەرچاوە ئاگادارە ڕایگەیاند: ئیدریس دادڕەس تاکوو ئێستا لە دەسپێڕاگەیشتن بە پارێزەر بێبەری بووە و لە شوێنی ڕاگیرانی زانیارییەک لەبەر دەستدا نییە.
سەرلەبەیانیی ڕۆژی سێشەممە ٥ی پووشپەڕی ١٤٠٣، هێزە ئەمنییەتییەکان بە بێ بەڵگەی یاسایی لە مەیدانی "جەهاد"ی مەریوان هێرشیان کردووەتە سەر ماڵی ناوبراو و دەسبەسەریان کردووە.
هێزە ئەمنییەتییەکان لە کاتی دەسبەسەرکردنی ئەم هاووڵاتییە کوردە، بە بەرچاوی ئەندامانی بنەماڵەکەیەوە لێیان داوە.
هەروەها هێزە ئەمنییەتییەکان دەستیان بەسەر مۆبایلی ئەم هاووڵاتییەدا گرتووە.
ئیدریس دادڕەس، کوڕی سابیر، خێزاندارە و ٥ منداڵی هەیە.
تاکو ئێستا لە هۆکاری دەسبەسەرکران و تۆمەتە وەپاڵدراوەکان دژی ناوبراو زانیارییەک لەبەر دەستدا نییە.
