کرماشان؛ برینداربوونی دوو لاوی کورد بە هۆی بڵاوکردنەوەی مۆسیقا و شایی لە پارکی "شەرقی" بە تەقەی هێزە ئەمنییەتییەکان
ئێوارەی ڕۆژی پێنجشەممە، ٢ی خاکەلێوەی ١٤٠٣، هێزە ئەمنییەتییەکان لە پارکی "شەرقی" لە نزیک تاقەوسانی کرماشان لە گەڕەکی "زەفەر"، هێرشیان کردە سەر کۆمەڵێک لاو و لە ئاکامی تەقەکردنی ئەم هێزانەدا، دوو لاوی کورد بە ناوەکانی "محەممەد ئەحمەدیانی" و "ئارمان بەسیری" بەسەختی بریندار بوون.
بە وتەی سەرچاوەیەکی ئاگاداری کوردپا، ئێوارەی ڕۆژی پێنجشەممە، کۆمەڵێک لاو کە خەریکی بڵاوکردنەوەی مۆسیقا و شایی لە پارکی "شەرقی" نزیک تاقەوسان لە گەڕەکی "زەفەر"ی کرماشان کەوتنە بەر هێرشی هێزە ئەمنییەتییەکان کە لەگەڵ ناڕەزایەتیی ئەم لاوانە بەرەوڕوو بوونەوە.
ئەم سەرچاوە ئاگادارە ڕایگەیاند: پاش ناڕەزایەتیدەربڕینی ئەم لاوانە سەبارەت بە دەستێوەردانی هێزە ئەمنییەتییەکان، هێزەکانی حکوومەت لە مەودای زۆر نزیکەوە تەقەیان لە محەممەد ئەحمەدیانی و ئارمان بەسیری کردووە و بە دەمانچە لاقیان پێکاون و بەسەختی برینداریان کردوون.
ئەم سەرچاوە ئاگادارە ڕایگەیاند: ئەم دوو لاوە کوردە بە بوونی هێزە ئەمنییەتییەکان لە نەخۆشخانەی بێستوونی کرماشان خەوێندراون و دۆخی ئارمان بەسیری بە هۆی بەرکەوتنی ١٠ فیشەک لە لاقی دۆخی ناجێگیر ڕاگەیەندراوە.
بنەماڵەی ئەحمەدیانی و بەسیری لەلایەن ناوەندە ئەمنییەتییەکانەوە هەڕەشەیان لێ کراوە کە منداڵەکانیان بە تۆمەتی "بێڕێزی و هەڕەشە"ی هێزەکانی حکوومەت دادگایی دەکەن، هەروەها مافی ڕاگەیاندن و وتووێژ لەگەڵ میدیاکان سەبارەت بەم پرسەیان نییە.
