ڕوونبوونەەوەی شوناسی ٦ کەس لەو کۆڵبەرانەی کە لەلایەن هێزە سنوورییەکانی تەوێڵەوە بێڕێزیان پێ کرابوو و لێیان درابوو
ڕۆژی ٣٠ی بەفرانباری ١٤٠٢، ڤیدیۆیەک لە توندوتیژیی هێزە سنوورییەکان لەگەڵ ژمارەیەک لە کۆڵبەرانی خەڵكی جوانڕۆ و مەریوان لە سنووری "تەویڵە" بڵاو بووەوە کە ئەم هێزانە وێڕای توندوتیژی، سەری ئەم کۆڵبەرانەشیان تاشیبوو.
ناو و شوناسی ٦ کەس لەم کۆڵبەرانە کە بەدستی کوردپا گەیشتووە، بریتین لە:
١ـ سەرکەوت شێرزاد، تەمەن ١٩ ساڵ کە ڕان، دەست، نێوقەد و سەری بریندار بووە.
٢ـ شۆڕش نەسروڵڵا، تەمەن ١٦ ساڵ کە لاق، ڕان، ددان و لووتی بریندار بووە.
٣ـ ئارش تەپ، تەمەن ٢٣ ساڵ کە لاق بریندار بووە.
٤ـ سەبوور مەعرووفی تەمەن ١٧ ساڵ کە ڕان، پشت و ژێرچاوی بریندار بووە.
٥ـ ڕێبین تاڵەبانی، تەمەن ١٦ ساڵ کە باسک، پشت و لاقی بریندرا بووە.
٦ـ پەیام دەهون تەمەن ١٦ ساڵ کە جەستەی شین هەڵگەڕاوە.
ئەم کۆڵبەرانە کە خەڵکی جوانڕۆ و کانی دیناری مەریوانن یەک شەو بە بێ دەسپێڕاگەیشتن بە ئاو و خواردن، لەلایەن هێزە سنوورییەکانی "تەوێڵە"ەوە دەسبەسەر کراون و هەموویان سەریان تاشراوە و بێڕێزییان پێ کراوە.
لە ڤیدیۆ بڵاوکراوەکەدا یەکێک لە کۆڵبەرەکان دەڵێ هێزە سنوورییەکان لەسەر زەوییەکە ڕایانکێشاون و بەتوندی بریندرایان کردوون، دواتریش سەریان تاشیون و بێڕێزییان پێ کردوون. یەک شەویش بە بێ ئاو و خواردن ڕایانگرتوون.
لە بەشێکی دیکە لە ڤیدیۆکەدا کۆڵبەرەکان بەشگەلێک لە جەستەی خۆیان کە بریندرا بووە، نیشان داوە.
سنووری تەوێڵە، لە ناوچە سنوورییەکانی نێوان کوردستانی ئێران و عێراقدایە.
