دەسبەسەرکرانی هاووڵاتییەکی دیکە لەلایەن هێزە ئەمنییەتییەکانەوە لە پیرانشار
سەرلەبەیانیی ڕۆژی سێشەممە ٢٦ی بەفرانبار، هاووڵاتییەکی کورد بە ناوی "بێهزاد محەممەدی"، تەمەن ٣٠ ساڵ، کوڕی موراد و خەڵکی گوندی "قرووچاوێ" سەر بە شاری پیرانشار لەلایەن هێزە ئەمنییەتییەکانەوە دەسبەسەر و بۆ شوێنێکی نادیار ڕاگوێزرا.
بە وتەی سەرچاوەیەکی ئاگادار، هێزە ئەمنییەتییەکان بە بێ بەڵگەی یاسایی ئەم هاووڵاتییە کوردەیان دەسبەسەر کردووە.
ئەم سەرچاوە ئاگادارە ڕایگەیاند: بەدواداچوونەکانی بنەماڵەی محەممەدی بە مەبەستی ئاگاداربوونەوە لە چارەنووسی کوڕەکەیان هیچ ئاکامێکی نەبووە.
بێهزاد محەممەدی خێزاندارە و منداڵێکی هەیە.
تا کاتی بڵاوبوونەوەی ئەم هەواڵە، لە هۆکاری دەسبەسەرکران و تۆمەتە وەپاڵدراوەکان دژی ئەم هاووڵاتییە، زانیارییەک لەبەر دەستدا نییە.
هەر لەم پێوەندییەدا، سەرلەبەیانیی ڕۆژی سێشەممە، ٢٦ی بەفرانبار، هاووڵاتییەکی کورد بە ناوی "سەلاح عوسمانی"، خەڵکی گوندی "خراپە" و دانیشتووی پیرانشار، لەلایەن هێزە ئەمنییەتییەکانەوە دەسبەسەر و بۆ شوێنێکی نادیار ڕاگوێزرا.
