بانە؛ برینداربوونی کۆڵبەرێک بە هۆی لێدانی هێزە نیزامییەکانی حکوومەت
19:02 - 11 رێبەندان 2723
ڕۆژی سێشەممە، ١٠ی ڕێبەندان، کۆڵبەرێک بە ناوی "بێهنام شەریفیان"، تەمەن ٣٠ ساڵ و خەڵکی سەقز، بە هۆی لێدانی هیزە نیزامییەکان لە سنووری "هەنگەژاڵ"ی بانە، بەتوندی بریندار بوو.
بە وتەی سەرچاوەیەکی ئاگادار، لاق، نێوقەد، پشت و ڕوخساری ئەم کۆڵبەرە بە هۆی لێدانی هێزە نیزامییەکانی حکوومەتەوە بەتوندی بریندار بووە.
ئەم سەرچاوە ئاگادارە ڕایگەیاند: ئەم کۆڵبەرە ئێستا بە مەبەستی وەرگرتنی چارەسەری پزیشکی لە نەخۆشخانەی سەلاحەدینی ئەیووبیی بانە خەوێندراوە.
ئەم سەرچاوە ئاگادارە وتی: هیزە نیزامییەکانی حکوومەت بە چەکی کڵاشینکۆف لەم کۆڵبەرەیان داوە.
ئەم سەرچاوە ئاگادارە وتیشی: هێزە نیزامییەکانی حکوومەت چاو و دەستی ئەم کۆڵبەرەیان بەستووە و لێیان داوە.
بێهنام شەریفیان خێزاندارە و باوکی منداڵێکە.
