زیندانی نەغەدە؛ حوسێن مەحموودپوور بە دانانی بارمتە ئازاد کرا
ڕۆژی دووشەممە، ٢٠ی سەرماوەز، هاووڵاتییەکی کورد بە ناوی "حوسێن مەحموودپوور"، کوڕی عەزیز، خەڵکی گوندی "گەرگوڵی خوارێ"، سەر بە شاری پیرانشار بە دانانی بارمتەی دوو میلیارد تمەنی و بە شێوەی کاتی لە زیندانی نەغەدە ئازاد کرا.
ئەم هاووڵاتییە لە ماوەی دەسبەسەرکرانیدا لە دەسپێڕاگەیشتن بە پارێزەر بێبەری بووە.
حوسێن مەحموودپوور لە ماوەی دەسبەسەرکرانیدا، ١٠ ڕۆژ لە گرتنگەی ئیتلاعاتی پیرانشار و ٢٥ ڕۆژ لە گرتنگەی ئیتلاعاتی ورمێدا لێپرسینەوەی لێ کراوە و پاش کۆتاییهاتنی لێپرسینەوەکەی، ڕەوانەی زیندانی نەغەدە کرابوو.
هێزە ئەمنییەتییەکان، ئەم هاووڵاتییەیان بە "ئەندامەتی و هاوکاری لەگەڵ یەکێک لە حیزبە کوردستانییەکانی ئۆپۆزسیۆنی حکوومەتی ئێران"، تۆمەتبار کردووە.
سەرلەبەیانیی ڕۆژی سێشەممە، ٢٤ی گەلاوێژ، هێزە ئەمنییەتییەکان بە بێ بەڵگەی یاسایی هێرشیان کردە سەر ماڵی ئەم هاووڵاتییە و دەسبەسەریان کرد.
حوسێن مەحموودپوور، لەدایکبووی ٣ی پووشپەڕی ساڵی ١٣٥١ـە.
