چارەنووسی سەفا عائێلی، خاڵۆی ژینا_مەهسا ئەمینی، ناڕوونە
سەرەڕای تێپەڕبوونی یەک مانگ لە دەسبەسەرکرانی سەفا عائێلی، خاڵۆی ژینا_مەهسا ئەمینی، چارەنووسی ناوبراو هەروا ناڕوونە.
بە وتەی سەرچاوەیەکی ئاگادار، بنەماڵەی سەفا عائێلی بە مەبەستی ئاگاداربوونەوە لە دۆخ و تۆمەتە وەپاڵدراوەکان دژی ناوبراو، چەندین جار سەردانی ناوەندە ئەمنییەتییەکانی سەقز و سنەیان کردووە بەڵام وڵامێکی ڕوونیان وەرنەگرتووەتەوە.
ئەم سەرچاوە ئاگادارە ڕایگەیاند: سەفا عائێلی تاکوو ئێستا لە دەسپێڕاگەیشتن بە پارێزەر و چاوپێکەوتن لەگەڵ بنەماڵەکەی بێبەری بووە.
ڕۆژی سێشەممە، ١٤ی خەرمانان، سەفا عائێلی، خاڵۆی ژینا_مەهسا ئەمینی، لەلایەن هێزە ئەمنییەتییەکانەوە دەسبەسەر کرا و بۆ یەکێک لە گرتنگە ئەمنیەتییەکانی سنە ڕاگوێزرا.
هێزە ئەمنییەتییەکان بە بێ بەڵگەی یاسایی هێرشیان کردووەتە سەر ماڵی ناوبراو و دەسبەسەریان کردووە.
تا کاتی بڵاوبوونەوەی ئەم هەواڵە، لە هۆکاری دەسبەسەرکران و تۆمەتە وەپاڵدراوەکان دژی سەفا عائێلی، زانیارییەک لەبەر دەستدا نییە.
