ئەیووب ئاغالیانی، لە دەسبەسەرکراوانی بزووتنەوەی ژن، ژیان، ئازادی بە مەبەستی جێبەجێکرانی حوکمەکەی ڕەوانەی زیندانی نەغەدە کرا
ڕۆژی چوارشەممە، یەکی خەرمانان، خۆپیشاندەرێک بە ناوی "ئەیووب ئاغالیانی"، تەمەن ٢٢ ساڵ، کوڕی جەهانگیر، پاش ئامادەبوون لە لقی جێبەجێکاری سزای دادسەرای گشتی و ئینقلابی ئەم شارە دەسبەسەر کرا و بۆ جێبەجێکردنی حوکمەکەی بۆ زیندانی نەغەدە ڕاگوێزرا.
ڕۆژی دووشەممە، ٥ی پووشپەڕ، ئەم خۆپیشاندەرە بە دانانی بارمتەی ٢١ میلیارد و ٢٥٠ میلیۆن تمەنی بە شێوەی کاتی لە زیندانی ناوەندیی ورمێ ئازاد کرا.
٢٥ی بەفرانباری ١٤٠١، ئەیووب ئاغالیانی لەلایەن لقی ١٠١ی دادگای کەیفەری ٢ی شنۆ، بە ١٠ ساڵ و ٦ مانگ زیندان و لێدانی ٧٠ قامچیی تەعزیری مەحکووم کرابوو.
کۆبوونەوەی دادگای پێڕاگەیشتن بە تۆمەتەکانی ئەم هاووڵاتییە بە شێوەی ویدیۆکۆنفرانس و بە بێ دەسپێڕاگەیشتن بە پارێزەر بەڕیوە چوو و دادگا ناوبراوی بە تۆمەتەکانی "کۆبوونەوە و تەبانی بە مەبەستی ئەنجامدانی تاوان دژی ئەمنییەتی نێوخۆیی وڵات" بە چوار ساڵ زیندان، "تێکدانی نەزم و ئاسایشی گشتی" بە یەک ساڵ زیندان و لێدانی ٧٠ قامچی، "تێکدانی کەلوپەلی گشتی" بە یەک ساڵ و ٦ مانگ زیندان و "بەشداری لە ئاگرتیبەردانی بەئەنقەستی کەلوپەلی گشتی" بە چوار ساڵ زیندان بە ڕەچاوکردنی زۆرترین سزا و بە هەژمارکردنی ماوەی دەسبەسەرکرانی پێشوو مەحکووم کرابوو.
حوکمی لقی ١٠١ی دادگای کەیفەری ٢ی شنۆ دژی ئەم هاووڵاتییە کوردە، لە دادگای پێداچوونەوەدا بە ٤ ساڵ زیندانی تەعزیری کەم کرایەوە.
لە ڕێبەندانی ١٤٠١دا، ئەیووب ئاغالیانی لە لقی ١٠٦ی دادگای کەیفەری ٢ی ورمێ بە تۆمەتی "تێکدانی کەلوپەلی گشتی بە مەبەستی دژایەتی لەگەڵ نیزام و تێکدانی نەزمی گشتی" بە یەک ساڵ و ٥ مانگ زیندان مەحکووم کرابوو.
ئەم خۆپیشاندەرە، ڕۆژی شەممە، ٢٠ی ڕەشەمەی ١٤٠١یش ، لە لقی ٣ی دادگای ئینقلابی ورمێ بە تۆمەتەکانی "تێکدانی نەزم و ئاسایشی گشتی(تێکدانی نەزمی گشتی بە هەرا) و تێکدانی کەلوپەلی گشتی بە مەبەستی دژایەتی لەگەڵ نیزام و هەستانەوەی چەکداری لە بەرانبەر حکوومەتی ئیسلامی(موحاربە و هەستانەوەی چەکداری دژی حکوومەتی ئیسلامی)"موحاکمە کرا و تاکوو ئێستا لەمبارەوە حوکمێکی پێ ڕانەگەیەندراوە.
ئەم هاووڵاتییە کوردەی خەڵکی شاری شنۆ ڕۆژی هەینی، ١٥ی ڕەزبەری ١٤٠١، لەلایەن هێزە ئەمنییەتییەکانەوە دەسبەسەر کرابوو.
