ورمێ؛ بەردەوامیی دەسبەسەرکران و ناڕوونیی چارەنووسی دوو هاووڵاتیی کورد
دوو هاووڵاتیی کورد بە ناوەکانی "سیامەک هەیاسی" و "ئالان داغدار"، خەڵکی گوندی "حاجیاوا"ی بۆکان، سەرەڕای تێپەڕبوونی ٤ مانگ لە دەسبەسەرکرانیان، هێشتا چارەنووسیان ناڕوونە و لە گرتنگەی ئەمنییەتیی ورمێدان.
بە وتەی سەرچاوەیەکی ئاگاداری کوردپا، ئەم دوو هاووڵاتییە تاکو ئێستا لە دەسپێڕاگەیشتن بە پارێزەر و چاوپێکەوتن لەگەڵ بنەماڵەکانیان ىێبەری کراون.
ئەم سەرچاوەیە ڕایگەیاند: سەرەڕای بەدواداچوونی بنەماڵەکانی ئەم دوو هاووڵاتییە لە ناوەندە ئەمنییەتییەکانی بۆکان و ورمێ، لەمەڕ دۆخ و چارەنووسیان هیچ زانیارییەک لەبەر دەستدا نییە.
دوانیوەڕۆی ڕۆژی چوارشەممە، ٣٠ی خاکەلێوە، هێزە ئەمنییەتییەکان بە بێ بەڵگەی یاسایی، سیامەک هەیاسییان دەسبەسەر و دواتریش دستیان بە پشکنینی ماڵەکەی کرد.
هێزە ئەمنییەتییەکان هەندێ کەلوپەلی کەسیی سیامەک، لەوانە لەپتاب، مۆبایل و فلەش مێمۆرییان لەگەڵ خۆیان بردووە.
ڕۆژی سێشەممە، ٢٩ی خاکەلێوە، ئالان داغدار بە بێ بەڵگەی یاسایی لە شوێنی کارەکەی خۆی لەلایەن هێزە ئەمنییەتییەکانەوە دەسبەسەر کرا.
تاکوو ئێستا لە هۆکاری دەسبەسەرکران و تۆمەتە وەپاڵدراوەکان دژی ئەم دوو هاووڵاتییە کوردە زانیارییەک لەبەر دەستدا نییە.
وێنە: سیامەک هەیاسی
