بیجاڕ؛ دەسبەسەرکرانەوەی زیبا قلیچ‌خانی لە دەسبەسەرکراوانی بزووتنەوەی ژن، ژیان، ئازادی بە هۆی "نووسینی کامێنت" و "سکاڵای هێزێکی ئەمنییەتی بە هۆی تف کردن لێی لە کاتی تێپەڕین لە شەقام"
ڕۆژی پێنجشەممە، ٢٦ی گەلاوێژ، زیبا قلیچ‌خانی، لە دەسبەسەرکراوانی بزووتنەوەی ژن، ژیان، ئازادی لە بیجاڕ، پاش تێگەیاندنی لە تۆمەتەکانی لە دادگای ئەم شارەدا، سەرلەنوێ دەسبەسەر کرایەوە و ڕەوانەی کانوونی ئێسڵاح و تەربییەتی سنە کرا.
بە وتەی سەرچاوەیەکی ئاگاداری کوردپا؛ دادگا، ئەم هاووڵاتییە کوردەی بە پڕوپاگەندە دژی نیزام لە سۆشیاڵ میدیا بە هۆی نووسینی کامێنتی ڕەخنەگرانە" و " سکاڵای هێزێکی ئەمنییەتی بە هۆی تف کردن لێی لە کاتی تێپەڕین لە شەقام"، تۆمەتبار کردووە.
ئەم سەرچاوە ئاگادارە ڕایگەیاند: زیبا قلیچ‌خانی، لەسەر سکاڵای وەزارەتی ئیتلاعات، بانگهێشتی دادگای بیجاڕ کرابوو.
زیبا قلیچ‌خانی ڕۆژی ٢٧ی خەرمانانی ١٤٠١، بە هۆی بەشداریکردن لە ناڕەزایەتییەکانی ژن، ژیان، ئازادی دەسبەسەر کرابوو و پاش دوو حەفتە، بە دانانی بارمتەی ٢ میلیارد تمەنی و بە شێوەی کاتی لە کانوونی ئێسڵاح و تەربییەتی سنە ئازاد کرا.
ئەم هاووڵاتییە خێزاندارە و دوو منداڵی بچووکی هەیە و هاوسەرەکەی نەخۆشە.
