کۆڵبەرێکی کورد بە تەقەی هێزە نیزامییەکانی حکوومەت لە سنووری بانە گیانی لەدەست دا
12:02 - 22 گەلاوێژ 2723
ڕۆژی یەکشەممە، ٢٢ی گەلاوێژ، کۆڵبەرێک بە ناوی "ئەرسەلان ڕەسووڵی"، خەڵکی سەردەشت، بە تەقەی هێزە نیزامییەکانی حکوومەت لە سنووری "هەنگەژاڵ"ی بانە، گیانی لەدەست دا.
هیزە نیزامییەکانی حکوومەت بە بێ ئاگادارکردنەوەی پێشوو و بە گومانی پێبوونی شتومەکی قاچاخ، تەقەیان لەم کۆڵبەرە کردووە.
تەرمی ئەم کۆڵبەرە گوازراوەتەوە بۆ بانە و تاکوو ئێستا ڕادەستی بنەماڵەکەی نەکراوەتەوە.
هەر لەم پێوەندییەدا، شەوی پێنجشەممە، ١٢ی گەلاوێژ، کۆڵبەرێک بە ناوی "هوشیار ئەمینی دۆسینە"، کوڕی محەممەد و خەڵکی گوندی "دۆسینە" سەر بە شاری بانە، بە تەقەی هێزە نیزامییەکانی حکوومەت گیانی لەدەست دا.
