بەردەوامیی دەسبەسەرکران و ناڕوونیی چارەنووسی دوو هاووڵاتیی کورد
دوو هاووڵاتیی کورد بە ناوەکانی "سیامەک هەیاسی" و "ئالان داغدار"، خەڵکی گوندی "حاجی ئاوا" سەر بە شاری بۆکان، هێشتا لە دەسبەسەریدان و زانیارییەک لەمەڕ چارەنووسیان لەبەر دەستدا نییە.
بە وتەی سەرچاوەیەکی ئاگادار، ئەم دوو هاووڵاتییە بە مەبەستی لێپرسینەوە بۆ یەکێک لە گرتنگە ئەمنییەتییەکانی ورمێ ڕاگوێزراون و لە دەسپێڕاگەیشتن بە پارێزەر و چاوپێکەوتن لەگەڵ بنەماڵەکەیان بێبەری کراون.
ئەم سەرچاوە ئاگادارە ڕایگەیاند: سەرەڕای سەردانی بنەماڵەی ئەم دوو هاووڵاتییە بۆ ناوەندە ئەمنییەتییەکان لە ورمێ و بۆکان، هێزە ئەمنییەتییەکان لە دانەوەی وڵامی ڕوون سەبارەت بە چارەنووسیان خۆ دەبوێرن.
دوانیوەڕۆی ڕۆژی چوارشەممە، ٣٠ی خاکەلێوە، هێزە ئەمنییەتییەکان بە بێ بەڵگەی یاسایی، سیامەک هەیاسییان دەسبەسەر کردووە و پاش دەسبەسەرکرانی ماڵەکەیان پشکنیوە.
هێزە ئەمنییەتییەکان هەندێک لە کەلوپەلی کەسیی سیامەک هەیاسی لەوانە لەپتاب، مۆبایل و فلەش مێمۆریی ناوبراویان لەگەڵ خۆیان بردووە.
ڕۆژی سێشەممە، ٢٩ی خاکەلێوەش، ئالان داغدار بە بێ بەڵگەی یاسایی لە شوێنی کارەکەی و لەلایەن هێزە ئەمنییەتییەکانەوە دەسبەسەر کرا.
تاکوو ئێستا لە هۆکاری دەسبەسەرکران و تۆمەتە وەپاڵدراوەکان دژی ئەم دوو هاووڵاتییە زانیارییەکی ورد دەست نەکەوتووە.
