سنە؛ دەسبەسەرکرانی مامۆستایەکی خانەنشینکراو لەلایەن هێزە ئەمنییەتییەکانەوە
ڕۆژی سێشەممە، ١٩ی بانەمەڕ، فاتح عوسمانی، مامۆستای خانەنشینکراوی قۆناغی سەرەتایی لە ڕەوتی ناڕەزایەتییەکانی مامۆستایانی سنە، لەلایەن هێزە ئەمنییەتییەکانەوە دەسبەسەر کرا.
ئەم مامۆستایە پاش دەسبەسەرکران بۆ شوێنێکی نادیار ڕاگوێزراوە و سەبارەت بەو ناوەندەی کە دەسبەسەری کردووە و هەروەها شوێنی ڕاگیرانیشی زانیارییەک لەبەر دەستدا نییە.
هەروەها ڕۆژی سێشەممە، ١٩ی بانەمەڕ، فەرزاد سەفیخانپوور، مامۆستای کۆمەڵناسی و لە چالاکانی سێنفیی مامۆستایانی سنە لە ڕەوتی کۆبوونەوەیەکی ناڕەزایەتیدا، لەلایەن پۆلیسەوە دەسبەسەر کرا.
ڕۆژی سێشەممە، ١٩ی بانەمەڕ هێزە سەرکوتکەرەکان لە شەقامی "ئێکباتان"ی سنە، ئیزنی بەڕێوەبردنی کۆبوونەوەی ناڕەزایەتییان بە مامۆستایان نەدا و لە شەقامی "تاڵەقانی"دا هێرشیان کردە سەر مامۆستایان و لێیان دان.
مامۆستایانی ناڕازی بە بەڕێوەبردنی کۆبوونەوەی ناڕەزایەتی لە شەقامدا، دروشمگەلێک وەکوو "ژن، ژیان، ئازادی" و "مامۆستای زیندانی دەبێ ئازاد بکرێ"یان وتەوە.
مامۆستایان بەپێی ڕاگەیەندراوی شۆرای هاواهەنگیی ڕێکخراوە سێنفییەکانی فەرهەنگییانی ئێران، ڕۆژی سێشەممە، ١٩ی بانەمەڕ لە ناڕەزایەتیدەربڕین بە پێڕانەگەیشتن بە داخوازییەکانیان لە بەردەم ئیدارەی پەروەردە و بارهێنان کۆبوونەوە.
