مەسعوود کوردپوور لە زیندانی بۆکان ئازاد کرا
ڕۆژی سێشەممە ٢٥ی ڕێبەندان، مەسعوود کوردپوور، بەڕێوەبەری ئاژانسی هەواڵی موکریان، لە زیندانی بۆکان ئازاد کرا.
بە وتەی سەرچاوەیەکی ئاگادار، ئەو ڕۆژنامەنووس و چالاکی مافی مرۆییە نە خۆی و نە پارێزەرەکەی بە هیچ شێوەیەک داوای لێخۆشبوونیان نەکردووە و ئازادکردنی ناوبراو بەبێ ئاگاداریی پێشووی خۆی بووە.
مەسعوود کوردپوور لەلایەن دادگای ئینقلابی بۆکانەوە، بە تۆمەتی "پڕوپاگەندە دژی نیزام" بە ٩ مانگ زیندان و "تێکدانی نەزمی گشتی" بە ٨ مانگ زیندان مەحکووم کرابوو.
مەسعوود کوردپوور ڕۆژی سێشەممە ٢٩ی خەرمانانی١٤٠١، لە ماڵەکەی خۆیدا، لەلایەن هێزە ئەمنییەتییەکانەوە دەسبەسەر و بۆ لێپرسینەوە ڕەوانەی یەکێک لە گرتنگە ئەمنییەتییەکانی ورمێ، کرابوو.
ئەو ڕۆژنامەنووسە کوردە پاش تەواوبوونی ماوەی لێپرسینەوەکەی بۆ زیندانی میاندواو و دواتر بۆ زیندانی بۆکان، ڕاگوێزرابوو.
مەسعوود کوردپوور پێشتریش چەند جارێک لەلایەن هێزە ئەمنییەتییەکانەوە دەسبەسەر و بە زیندان مەحکووم کرابوو.
