سێ هاووڵاتیی کورد بە دانانی بارمتەی قورس لە زیندانی نەغەدە ئازاد کران
ڕۆژی سێشەممە ٢٥ی ڕێبەندان، سێ هاووڵاتیی کورد بە ناوەکانی "سینا دەشمیر" تەمەن ١٩ ساڵ کوڕی کەماڵ، "قادر محەممەدپوور" تەمەن ٣٥ ساڵ کوڕی عەزیز و "موحسن قادری" تەمەن ٢٩ ساڵ کوڕی تاهیر، خەڵکی گوندی " گەزگەسک" سەر بە شاری پیرانشار، هەر کامەیان بە دانانی بارمتەی ٤ میلیارد تمەنی بە شێوەی کاتی، لە زیندانی نەغەدە ئازاد کران.
ئەو سێ هاووڵاتییە لەو ماوەیەدا، لە گرتنی پارێزەر و چاوپێکەوتن لەگەڵ بنەماڵەکەیان، بێبەری کرابوون.
ئەم سێ هاووڵاتییە، سەرلەبەیانیی ڕۆژی چوارشەممە ٢٨ی بەفرانبار، بەبی بەڵگەی یاسایی لەلایەن هێزە ئەمنییەتییەکانەوە دەسبەسەر و بۆ لێپرسینەوە ڕەوانەی یەکێک لە گرتنگە ئەمنییەتییەکانی ورمێ، کرابوون.
ئەم سێ هاووڵاتییە پاش تەواوبوونی ماوەی لێپرسینەوەکەیان، بۆ زیندانی نەغەدە ڕاگوێزرابوون و تاکوو ئێستا هیچ زانیارییەک لەمەڕ تۆمەتە وەپاڵدراوەکان دژی ئەوان لەبەر دەستدا نییە.
وێنە لە ڕاستەوە و بۆ چەپ: سینا دەشمیر، موحسن قادری و قادر محەممەدپوور
