چالاکێکی مەدەنی لە پیرانشار دەسبەسەر کرا
11:24 - 28 بەفرانبار 2722
سەرلەبەیانیی ڕۆژی چوارشەممە ٢٨ی بەفرانبار، تەها ڕەسووڵیان، چالاکی مەدەنیی خەڵکی شاری پیرانشار، لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
بەوتەی سەرچاوەیەکی ئاگادار، هێزە ئەمنییەتییەکان بەبێ بەڵگەی یاسایی ئەو چالاکە مەدەنییە کوردەیان دەسبەسەر کردووە.
ئەو سەرچاوەیە هەروەها ئەوەشی خستەڕوو: هێزە ئەمنییەتییەکان پاش دەسبەسەرکردنی ئەو چالاکە مەدەنییە، هێرشیان کردبووە سەر ماڵەکەی و دەستیان بە پشکنینی ماڵەکەی کردبوو.
هەتا کاتی بڵاوبوونەوەی ئەم هەواڵە، لە هۆکاری دەسبەسەرکران و تۆمەتی وەپاڵدراو دژی تەها ڕەسووڵیان، زانیارییەک لەبەر دەستدا نییە.
