گوڵاڵە مورادی لە زیندانی ناوەندیی ورمێ چارەنووسی ناڕوونە
هاووڵاتییەک بە ناوی "گوڵاڵە مورادی"، خەڵکی پیرانشار، سەرەڕای تێپەڕبوونی ٦ مانگ لە دەسبەسەرکرانی، هەنووکە لە زیندانی ناوەندیی ورمێیە و هەروا چارەنووسی ناڕوونە.
بە وتەی سەرچاوەیەکی ئاگادار، ئەو هاووڵاتییە لە ماوەی دەسبەسەرکرانیدا، لە "دەسپێڕاگەیشتن بە پارێزەر" بێبەری کراوە و هەتا ئێستا کۆبوونەوەی دادگایی بۆ ناوبراو بەڕێوە نەچووە.
ئەو سەرچاوە ئاگادارە هەروەها وتوویەتی: "گوڵاڵە مورادی لە ماوەی دەسبەسەرکرانیدا سەرەڕای ئەوەیکە ئازار و ئەشکەنجە دراوە، بۆ وەرگرتنی دانپێدانانی زۆرەملێ لەژێر گوشاریش بووە".
سەرلەبەیانیی ڕۆژی شەممە ٢٨ی خاکەلێوە، گوڵاڵە مورادی وێڕای دوو کوڕەکەی بە ناوەکانی "مەتین بەزازی" و "تاهیر بەزازی" لەلایەن هێزە ئەمنییەتییەکانەوە دەسبەسەر کران و بۆ لێپرسینەوە ڕەوانەی گرتنگەی ئیتلاعاتی سپا لە ورمێ کرابوون.
ئەو سێ هاووڵاتییە، پاش کوژرانی عوسمان حاجی حوسێنی، ئەندامی سپای پاسداران لەلایەن هێزە ئەمنییەتییەکانەوە دەسبەسەر و کوڕەکانی گوڵاڵە پاش کۆتایی لێپرسینەوەکەیان، ئازاد کران.
مانگی جۆزەردانی ئەمساڵ، گوڵاڵە مورادی پاش کۆتایی لێپرسینەوە لە گرتنگەی ئیتلاعاتی سپا لە ورمێ، بۆ زیندانی ناوەندیی ئەو شارە ڕاگوێزرا.
