پشتیوانی كەسایەتییە فەرهەنگی و سیاسییەكانی كوردستانی ئێران لە سەربەخۆیی هەرێمی كوردستان

ئاژانسی كوردپا: حكوومەتی هەرێمی كوردستان وێڕای رەخنە لەسیاسەتەكانی حکوومەتی بەغدا و هەروەها دۆخی خراپ و ناجێگیری عێراق، بڕیاری یەكلایی كردنەوەی كێشەكانی لەرێگەی رێفراندۆمەوە لەگەڵ حكوومەتی ناوەندی، داوە.

بەپێی راپۆرتی ئاژانسی هەواڵدەریی كوردپا، پرسی رێفراندۆمی هەرێمی كوردستان بۆتە پرسێكی گشتگیر و بەوتەی كەسایەتییەكی سیاسیی كوردستانی ئێران، بەڕێوەبردنی رێفراندۆم و راگەیاندنی سەربەخۆیی لەهەر وڵاتێكدا، بەستراوەتە بە یەكڕیزی و یەکهەڵوێستیی حیزب و دانیشتوانی ئەو شوێنە.

رێفراندۆم یەكێك لەبنەمای مافە سەرەتاییەکانە و هەروەها لە ئەدەبیاتی زانستی سیاسی، دێمۆكراسی و سیستەمی دەسەڵاتی خەڵكییدا بە چەمکێکی گرینگ دێتە ئەژمار. وشەی رێفراندۆم (referendum) بە واتای گەڕانەوە و پشت بەستن بە دەنگی گشتیی هاووڵاتییان بۆ دیاری كردنی شێوازی نیزام، تەئیدی یاسای بنەڕەتی و هەروەها سەربەخۆیی وڵات.

بەپێی ئەو بنەمایانەی سەرەوە مەسعوود بارزانی سەرۆكی هەرێمی كوردستان ماوەی دوو حەفتە لەمەوبەر لەپارڵەمانی كوردستان پرسی رێفراندۆمی ( ناوچە كێشە لەسەرەكان، سەربەخۆیی هەرێمی كوردستان) هێنایە بەر باس و مكانیزمی بەڕێوەبردنی ئەو پرسەی خستە ئەستۆی نوێنەرانی خەڵكی هەرێم لەپارڵەمان.

لەو نێوەدا حیزبە سیاسی و كەسایەتییە فەرهەنگییەكانی كوردستانی ئێران پشتیوانی خۆیان لە بەڕێوەبردنی رێفراندۆم و لە ئەنجامدا سەربەخۆیی هەرێمی كوردستان دەربڕیوە و لەهەمان كاتیشدا نیگەرانیی خۆیان لە زیانە بەرایی و كورت خایەنەكانی ئەو پرسە نەشاردۆتەوە.

كوردستانی ئێران و پشتیوانی لەهەرێمی كوردستان- (عێراق)

بەهمەن قوبادی سینەماكاری ناسراوی كورد هەڵوێستی خۆی لەسەر پرسەكانی هەرێمی كوردستان دەربڕیوە و گوتوویەتی: \" بەبڕوای من هەرێمی كوردستانی عێراق دەبێت سەربەخۆیی خۆی رابگەیەنێت و ببێتە شوێنێك بۆ ئەو كوردانەی كە لەوڵاتی خۆیان و لەملاو و ئەولا جێگە و رێگایەكیان نییە و هەرێمی كوردستانی سەربەخۆ، ئەوان وەكوو جاران لە ئامێز بگرێت و ببێتە نیشتمانی سەرەكیی ئەم خەڵكە بێ پەنایە\".

قوبادی لەوتووێژ لەگەڵ دەزگا راگەیەنەكانی وڵاتی ئیتالیا ئەوەشی خستۆتەڕوو، هەنووكە باشترین دەرفەت بۆ سەربەخۆیی هەرێمی كوردستانە و ئەو هەرێمە ئاوات و هیوای كوردانی هەر چوار بەشی كوردستانە.

ئەو سینەماكارە كوردە، كە بۆ بەشداری لە فێستیڤاڵی نێودەوڵەتیی \"سپۆلێتۆ\" Spoleto سەردانی وڵاتی ئیتالیای كردووەو لە كۆنفرانسێكی رۆژنامەوانیدا كە چەندین ئاژانسی هەواڵدەریی پڕۆفیشناڵی وەكوو: رۆژنامەی \"كۆریێر دێلاسێرا\" CORRIERE DELLA SERA، \"لێ رێپۆبلیكا\" LA REPUBBLICA و ئاژانسی هەواڵی \"ئانسا\" ANSA حوزووریان هەبووە گوتوویەتی: هیوام وایە وەكوو سینەماكارێكی كورد لە دونیادا پێناسە بكرێم و ئەگەر هەر فێستیڤاڵ یان ناوەندێكی هونەریی كە لە دنیادا بانگهێشتم دەكات، پێم باشە وەكوو سینەماكارێكی ئێرانی ناوم نەهێنن.

لەلایەكی دیكەوە حیزبی دێمۆكراتی كوردستانی ئێران و كۆمەڵەی شۆڕشگێڕی زەحمەتكێشانی كوردستانی ئێران بە شێوەی فەرمی پشتیوانیی خۆیان لەسەربەخۆیی هەرێمی كوردستان راگەیاندووە.

مستەفا هیجری، سكرتێری گشتیی حیزبی دێمۆكرات لە رێوڕەسمی ٢٥‌ـەمین ساڵیادی تیرۆركرانی دكتور عەبدوڵرەحمان قاسملوودا گوتوویەتی: \" ئێمە بە تەواوەی هێزەو پشتیوانی خۆمان لە پرسی رێفراندۆم لەهەرێمی كوردستان دەردەبڕین و وتوویەتی: لەمێژ ساڵە ئەو پرسە بۆتە خولیا و هیوای حیزبی دێمۆكرات و خەڵكی كوردستانی ئێران\".

ماڵپەڕی كوردستان میدیا زمانحاڵی حیزبی دێمۆكراتی كوردستانی ئێران لەزاری هیجرییەوە بڵاوی كردۆتەوە، هەر چەندە سەربەخۆیی كوردستانی باشوور پیرۆز و جێگەی خۆشحاڵییە، لەهەمان كاتیشدا دوو خاڵ بۆ راگەیاندنی سەربەخۆیی زۆر گرینگن.\"

سكرتێری ئەو حیزبە، یەكڕیزی و یەکهەڵویستیی حیزبەكانی هەرێمی كوردستان و هەروەها پشوودرێژی و خۆراگری خەڵكی لەهەمبەر كێشە و ئاریشە كورت خایەنەكانی بە دوو هۆكار و پشتیوانی سەرەكیی سەربەخۆیی لەو هەرێمەدا راگەیاندووە و ئەوەشی خستۆتەڕوو، كە حكوومەتی ئیسلامیی ئێران لەهەوڵی ئاژاوە نانەوە لەنێو پێكهاتەكانی عێراق و لەمپەر خستنە بەردەم بەڕێوەچوونی رێفراندۆمی هەرێمی كوردستاندایە.

هەر لەو پێوەندییەدا عەبدوڵڵا موهتەدی سكرتیری كۆمەڵەی شۆڕشگێڕی زەحمەتكێشانی كوردستانی ئێرانیش، وێڕای پشتیوانی لە رێفراندۆمی هەرێمی كوردستان وتوویەتی: خەڵكی كوردستان زۆر بە باشی بەرەوپیری رێفراندۆمەو دەچن.

موهتەدی لەو باوەڕەدایە، ئەو رێفراندۆمە كارێگەری لەسەر خەڵكی كوردستانی ئێرانیش دەبێ‌و چاوەڕوانی ئەوە دەكات كە خەڵكی كوردستانی ئێران بە ورە و زەیەكی دیكەوە بە دواداچوون بۆ مافەكانیان بكەن.

سكرتێری كۆمەڵە، هەڵوێستی خەڵكی كوردستانی ئێران لە هەڵویستی حكوومەتی ئێران جیا دەكاتەوە و دەڵێت‌، \"كۆماری ئیسلامیی سیاسەتێكی هەڵە و نادروستی لەهەمبەر كوردستاندا گرتۆتە بەر و پشتیوانی لە سیاسەتە بێ‌بنەما و كێشە خوڵقێنەكانی مالكیی دەكات\".