نەبوونی پردی پەڕینەوە لە شاڕێگەیەكی ورمێ، گیانی منداڵانی خستۆتە مەترسیەوە

كوردپا: شاڕێگای باهونەر لە ورمێ هەتا ئێستاش پردی پەڕینەوەی نیە و ئەوەش زۆر گرفتی بۆ هاووڵاتیان و بەتایبەت منداڵانی قوتابی ساز كردووە.

بەپێی هەواڵی گەیشتوو بە ئاژانسی هەواڵدەریی كوردپا، شاڕێگەی باهونەر كە قەرەباڵغترین و سەرەكیترین رێگای ئەو شارە لەگەڵ شارەكانی دەوروبەری دێتە ئەژمار، بەهۆی رەچاو نەكردنی لایەنی ستاندارد و ئەندازیاری، گیانی هاووڵاتییان و بەتایبەت منداڵانی لەگەڵ مەترسی بەرەڕوو كردووە.

ئەو رێگایە بەبێ ستانداردی رێگاوبان و لە ناوچەیەكی نیشتەجێ بوونی هاووڵاتییان ساز كراوە كە ئەوەش ژیانی هاووڵاتییانی خستۆتە مەترسییەوە و زۆر رووداوی هاتوچۆ لەو شوێنە رووی داوە و بە تایبەت بۆ قوتایبان بۆتە مەترسییەكی گەورە.

بە وتەی شایەتحاڵان لە سێ ساڵ لەمەوبەرەوە بڕیار بوو لەسەر رێگای پردی \"قویوون\"ی ئەو شارە بۆ فەلەكەی مودەڕس، شەش پردی پەڕینەوە ساز بكرێت، بەڵام هەتا ئێستا ئەو بڕیار و پڕۆژەیە جێبەحێ نەكراوە.