لە سلێمانی بە بەشداریی ١٥ وڵات فێستیڤاڵی کولتووریی گەلان بەڕێوە دەچێت

ئاژانسی کوردپا: به‌ڕێوه‌به‌رایه‌تی گشتیی رۆشنبیری هونه‌ر و لاوانی گه‌رمیان، لە رۆژانی ٢٩ی رەشەممە هەتا ٥ی نەورۆز بە بەشداریی ١٥ وڵات لە سنووری ئوستانی سلێمانی و ناوچەی گەرمیان فێستیڤاڵی کولتووریی گەلان بەڕێوە دەبات.

ماڵپەڕی سەردەم بڵاوی کردەوە، ئەو فێستیڤاڵە بۆ ماوەی ٣ رۆژ لە شارەکانی کەلار و سلێمانی و هەروەها بۆ ماوەی ٣ رۆژی دیکەش لە ناوچەکانی گەرمیان درێژە بە چالاکییەکانی خۆی ئەدات.

وڵاتانی میسر، هۆلەند، ئۆردۆن، بولغارستان، شیلی و چه‌ند وڵاتێکی‌دیکه‌و کۆمەڵێک تیپی‌هونه‌ری له‌شاره‌کانی‌سلێمانی‌، هه‌ولێر ‌و دهۆک له‌فێستیڤاڵی که‌لتووریی گه‌لاندا به‌شداری دەکەن.

لەلایەکی دیکەوە رێکەوتی ٢١ی رەشەممە حەوتەمین فێستیڤاڵی هونەری لە ژێر ناوی \"نەورۆز و ئازادی\" لە شاری هەولێر و بە بەشداری گرووپە هونەرییەکانی بەشەکانی دیکەی کوردستان دەست بە کارەکانی خۆی دەکات.

ئەو فێستیڤاڵە بۆ ماوەی ٨ رۆژ لە پارکی شانەدەری شاری هەولێر بەڕێوە دەچێت و کۆمەڵێک بەرنامەی تایبەت بە یادی شیمیاباران کردنی هەڵبجە و چەندین فیلمی دیکیۆمێنتی تێدا نمایش دەکرێت.