دیواندەرە؛ چرۆ ئەحمەدی، مامۆستای زمانی کوردی دەسبەسەر کرا
ڕۆژی دووشەممە ٢٥ی گەلاوێژ، چرۆ (ژاڵە) ئەحمەدی، مامۆستای زمانی کوردی و ئەندامی هەیئەتی بەڕێوەبەریی دامەزراوەی فەرهەنگی ــ کۆمەڵایەتیی زاگرۆس، لە شاری دیواندەرە لەلایەن هێزە ئەمنییەتییەکانەوە دەسبەسەر و ڕەوانەی شوێنێکی نادیار کرا.
بە وتەی سەرچاوەیەکی ئاگادار، هێزە ئەمنییەتییەکان بەبێ بەڵگەی یاسایی هێرشیان کردووەتە سەر ماڵی ئەو چالاکە فەرهەنگییە و پاش پشکنینی ماڵەکەی، ناوبراویان دەسبەسەر کردووە.
ئەو سەرچاوە ئاگادارە هەروەها وتوویەتی: "هێزە ئەمنییەتییەکان مۆبایل و هەندێک کەرەستەی کەسیی ئەو مامۆستایەی زمانی کوردییە لەوانە کتێب و لەپ‌تاپەکەیان لەگەڵ خۆیان بردووە".
ئەو سەرچاوە هەروەها ئەوەشی خستە ڕوو کە هێزە ئەمنییەتییەکان هەروەها مۆبایلی ئەندامانی بنەماڵەی ئەو چالاکە کوردەیان لەگەڵ خۆیان بردووە.
چرۆ ئەحمەدی، دەرچووی کارناسیی بواری ئەندازیاریی شیمی و هەروەها کارناسیی بواری ڕۆژنامەنووسی لە زانکۆی پەیام‌نووری سنەیە.
ئەو چالاکە فەرهەنگییە تەمەنی ٣٠ ساڵە و خەڵکی دیواندەرە و دانیشتووی سنەیە کە لە ماوەی ساڵانی ڕابردوودا لە دامەزراوەی فەرهەنگی ــ کۆمەڵایەتیی زاگرۆس، مامۆستای زمانی کوردی بووە.
هەتا کاتی بڵاوبوونەوەی ئەم هەواڵە، لە هۆکاری دەسبەسەرکران و تۆمەتی وەپاڵدراو دژی چرۆ ئەحمەدی، زانیارییەک لەبەردەستدا نییە.
