تاران؛ حوسێن سەفامەنش و خەبات فەدایی لەلایەن هێزە ئەمنییەتییەکانەوە دەسبەسەر کران
ڕۆژی پێنجشەممە ١٤ی ڕەزبەر، حوسێن سەفامەنش، هونەرمەندی کورد خەڵکی کرماشان لەلایەن هێزە ئەمنییەتییەکانەوە لە تاران دەسبەسەر کرا.
یەکێک لە نزیکانی ئەو هونەرمەندە کوردە بە ئاژانسی کوردپا ڕایگەیاندووە: ئەو هونەرمەندە بەهۆی ناڕەزایەتیی دەربڕین بە قەتڵی حکوومەتیی ژینا ئەمینی، هاوکاری‌نەکردن لەگەڵ وەزارەتی ئیرشاد و دەنگ و ڕەنگی کۆماری ئیسلامی، لەلایەن هێزە ئەمنییەتییەکانەوە دەسبەسەر و لە یەکێک لە گرتنگە ئەمنییەتییەکانی تاران، ڕاگیراوە.
حوسێن سەفامەنش پاش قەتڵی حکوومەتیی ژینا ئەمینی و ناڕەزایەتییە خەڵکییەکان بە نیشانەی ناڕەزایەتیی بە کوژرانی ژینا ئەمینی، کۆتایی بە هاوکاریی خۆی لەگەڵ وەزارەتی ئیرشاد و دەنگ و ڕەنگی کۆماری ئیسلامی هێنا.
ئەو هونەرمەندە کوردە لە لاپەڕەی کەسیی خۆی لە ئینستاگرام نووسیبوو: "ئەرکی سەرشانی هونەرمەندێک ئەوەیە کە لە قۆناغە مێژووییەکان پشتیوانی خەڵکەکەی بێت نە لە بەرانبەرایان ڕابوەستێت".
لە لایەکی دیکەوە، خەبات فەدایی، هونەرمەندی کورد خەڵکی گوندی "بۆڕیەر" سەر بە شاری سەوڵاوا و دانیشتووی شاری تاران لەلایەن هێزە ئەمنییەتییەکانەوە دەسببەسەر کرا.
ئەو هونەرمەندە کوردە لە ماوەی ساڵانی ڕابردوودا، بەهۆی چالاکییەکانی چەند جار لەلایەن ناوەندە ئەمنییەتییەکانەوە بانگهێشت و لێپرسینەوەی لەگەڵ کرابوو.
خەبات فەدایی هەروەها ساڵی ١٤٠٠، لە دادگای گشتی و ئینقلابی شاری سەوڵاوا لە تۆمەتی‌وەپاڵدراوی "پڕۆپاگەندا دژی نیزام" بێتاوان ناسرابوو.
