بەشێكی بەرچاو لەژینگە و سروشتی \"بێستوون\" لەئاگردا سووتا

ئاژانسی كوردپا: لەئەنجامی ئاگركەوتنەوە لەبەرزاییەكانی \"مێشە رێ‌\"‌ی ناوچەی بێستوون، سی هێكتار لە دارستان ولەوەڕگەكانی ئەو ناوچەیە بوون بە خۆڵەمێش.

بەپێی هەواڵی ئاژانسی هەواڵدەریی كوردپا، ژینگە و سروشتی ناوچەی پارێزراوی بێستوون لەكرماشان، رۆژی هەینی رابردوو ئاگری تێبەربوو، کە بەو هۆیەوە خەسارێكی بەرچاو بە ژینگە و سروشتی ئەو ناوچەیە گەیشت.

لەو رووداوەدا سی هێكتار لە لەوەڕگەكانی \"مێشە رێ‌(رێواسان)\" سووتاو و ژمارەیەكی بەرچاویش داری وەكوو بەڕوو و بەڵاڵووک لەناو چوون.

ئەو ناوچەیە بە حوكمی سەرسەوزی و ژینگە دڵڕفێنەكەی، ئاژەڵ و باڵەندەیەكی زۆریش تێیدا ژیان بەسەر دەبەن.

ئیدارەی ژینگەپارێزیی ئوستانی كرماشان وێڕای پشتڕاستكردنەوەی ئەو هەواڵە راشیگەیاندووە، \"كەمتەرخەمیی گەشتیاران و كەسانی هەلپەرەست هۆكاری ئەو ئاگر كەوتنەوەیە بووە\".

ئەو ئاگركەوتنەوەیە دوای نزیک بە ٢٠ كاتژمێر لەلایەن تیمەكانی ژینگەپارێزیی كرماشان و هەرسینەوە كۆنترۆڵ كراوە.

ناوچەی پارێزراوی بێستوون بە یەكێک لە چوار ناوچەكانی كۆنترۆڵ كراو دێتە ئەژمار و رووبەرەكەشی پەنجاو چوار هەزار ٦٦٣ هێكتارە.

بەپێی ئامارە فەرمییەكان، لەپێنج مانگی سەرەتایی ئەمساڵدا، ٢٧ حاڵەتی ئاگركەوتنەوە لە لەوەڕگە و دارستانەكانی كرماشان رووی داوە.