بەرموور، راپۆرتی حەفتانەی ئاژانسی کوردپا سەربارەت بەپرسی ژنان

حەفتەی دووهەمی مانگی پووشپەڕی ١٣٩٢ی هەتاوی
ئاژانسی کوردپا: بەمەبەستی زیاتر زەق کردنەوە و تاوتوێ کردنی مەسەلە پەیوەندیدارکانی تایبەت بە ژنان، ئاژانسی کوردپا بەشێوی حەفتانە راپۆرتێک لەژێر ناوی \"بەرموور\" بڵاو دەکاتەوە.


ئامانجی سەرەکی لە بڵاوکردنەوەی ئەم راپۆرتە تایبەتییە، زەق کردنەوەی پێشلکارییەکانی دەرهەق بە ژنان و هەروەها گرینگی دان بە سەرجەم چالاکییەکانی ژنان کە لەلایەن ژنان و رێکخراوەکانی پەیوەندیدار بە ژنانەوە ئەنجام ئەدرێت.

بەهۆی بەربڵاوی و گرینگیی ئەم بابەتە و هەروەها نەبوونی دەنگدانەوە لە ناو میدیاکاندا، \"بەرموور\" بە شێوەی دیاریکراو دەپرژێتە سەر بابەت و مەسەلەکانی ژنان لە ناوچە کوردنشینەکانی ئێران، بەڵام ئەمە بەو واتایە نییە کە ناوچەکانی دیکەی ئێران دەخرێنە پەراوێزەوە، بۆیە ئاژانسی هەواڵدەریی کوردپا هەوڵ ئەدات بەپێی ئیمکان، گرینگی بە سەرجەم ناوچەکان دیکەی ئێرانیش بدات.

لەم راپۆرتەدا خۆکوژیی کچێکی لاو لە کامیاران و کوژرانی ژنێک بە دەستی هاوسەرەکەی لە پیرانشار، دەستبەسەرکرانی چالاکێکی کورد لە بۆکان، بانگهێشت و لێپرسینەوە لە سەمیرا فەلاح هاووڵاتیی بەهایی، مەحکووم کرانی نەسیم ئەشرافی بە ٣ ساڵ زیندانیی تەعیزری، دانی مەرەخەسی بە \"لوا خانجانی\"، بێبەشکرانی \"ئایدا بەندی\" لە درێژەدان بە خوێندن لە زانکۆی پەیامی نووری شیراز، ئێعدام کرانی ٥ ژن لە زیندانی ناوەندیی زاهیدان، هەوڵی خۆکوژیی زیندانییەکی ئەمنیەتیی بەندی ژنانی زیندانی ئێڤین و ئازدکرانی سەمیرا رەزاقی دەخرێتەڕوو.

کوردستـــــــــــان
خۆ کوژیی کچێکی لاو لە کامیاران و کوژرانی ژنێک بە دەستی میردەکەی لە پیرانشار
لە رۆژانی حەوتووی رابردوو دا کچێکی لاو لە کامیاران دەستی دایە خۆکوژی و گیانی لە دەست داو لەلایەکی دیکەوە هاووڵاتییەکی خەڵکی پیرانشار بە چەقۆ گیانی هاوسەرەکەی خۆی ئەستاند.

\"13920.jpg\"
رۆژی شەممە ١٥ی پووشپەڕ، کچێکی لاو بە ناوی \"سەرگوڵ خاتەمی\" لە ئاوایی\"مەرگسار\"ی کامیاران دەستی دایە خۆ کوژی و گیانی لە دەست دا.

بە خۆکوژیی ئەم کچە تەمەن ١٧ ساڵەیە لە کامیاران، رێژەی ئەو ژن و کچانەی کە لە سەرەتای ئەمساڵەوە لە ناوچە کوردنیشینەکانی ئێرن دەستیان داوەتە خۆکوژی گەیشتە ٢٤ کەس.

ئەوەی کە لێرەدا جێگەی تێڕامانە ١٢ کەس واتە ٥٠%ی ئەو ژنانەی کە دەستیان داوەتە خۆکوژی و گیانیان لە دەست داوە تەمەنیان لە ژێر ٢٠ ساڵدا بووە کە دەتوانێ زەنگی مەترسییەک بێت بۆ کۆمەڵگەی کوردستان.

لە لایەکی دیکەوە، رۆژی چوارشەممە ١٨ی پووشپەڕ، ژنێکی خەڵکی شاری شنۆ بە ناوی \"سنەوبەر\" بە دەستی هاوسەرەکەی خۆی لە شاری پیرانشار بە چەقۆ گیانی لێ ئەستێندرا.

دەگوترێت سنەوبەر دووگیان بووەو کەبەهۆی لکیدانی لەڕادەبەدەر لەلایەن هاوسەرەکەیەوە، منداڵەکەشی گیانی لە دەست داوە.

بەپێی ئاماری تۆمار کراو لە ناوەدەی ئاماری ئاژانسی کوردپا، لەسەرەتای مانگی خاکەلێوەی ئەمساڵەوە هەتا ئێستا ٨ ژن و کچی کورد لە ناوچە کوردنشینەکانی ئێران تەنیا بەدەستی کەسوکاری نزیکی خۆیان کوژراون.
ئەو ئامارە رێژەییەوە بە پشت بەستن بەئاماری ئاژانسی کوردپا بڵاو دەکرێتەوە کە دەکرێ ئاماری راستەقینە لەو رێژەیەش زیاتر بێت.

دەستبەسەر کرانی یەکێک لە چالاکانی ژن لە شاری بۆکان
رۆژی دووشەممە رێکەوتی ١٧ی پووشپەڕ \"شەهێن بایزیدپوور\" یەکێک لە ئەندامانی دامەزرێنەری \"ئەنجومەنی کەمئەندامانی\" شاری بۆکان دستبەسەر و بۆ شوێنێکی نادیار راگوێزرا.
\"13917.jpg\"
شەهێن بایزید‌پوور یەکێک لە ئەندامانی خوولی دووەمی شۆرای شاری بۆکان و هەرەوەها یەکێک لە چالاکانی ئەنجومەنی کەمئەندامی شاری بۆکان بووە.

هەتا ئێستا هیچ زانیارییەک لەمەڕ هۆکاری دەستبەسەرکرانی ناوبراو و هەروەها شوێنی راگیرانی لە بەر دەست دا نیە.

ئێـــــــــــــــــــــــــران
دۆخی ژنان و چالاکانی ژنی بەهایی لە ئیران دا
بەهاییەکان بە حەشیمەتێکی زیاتر لە نیو میلیۆن کەس یەکێک لە گەورەترین کەمایەتییە ئایینییەکانن کەلە وڵاتی ئێراندا بە فەرمی نەناسراون. مافی هاووڵاتییانی بەهایی بە شێوەیەکی سیستماتیک لەلایەن دامەزراوە حکومەتی و ئەمنییەکانی حکومەتی ئیسلامی ئێرانەوە پێشل دەکرێت.

مافەکانی ژنانی بەهاییش بە شێوەیەکی بەربڵاو و بەردەوام لە لایەن دەزگا حکوومەتییەکانەوە پێشل دەکرێت. بە شێوەیەک کەلە ماوەی ساڵانی رابردوودا رێژەیەکی بەرچاو لە ژنانی بەهایی بە هۆی باوەڕمەند بوون بە ئایینی بەهایی لەخوێندن بێبەش کراون، یان رەوانەی زیندانەکانی سیمنان، مەشهەد، و.... کراون و زۆر جاریش بینراوە کە ژنانی بەهایی لە کاتی تێپەڕکردنی ماوەی حوکمەکەیاندا، ناچار بوون کە منداڵە ساوا و شیرخۆرەکانیان لە نێو زینداندا پەروەردە کردووە.

لە ماوەی حەفتەی رابردوودا گوشارەکان بۆ سەر پەیڕەوانی ئایینی بەهایی زیادی کردووە بە چەشنێک کە شاهیدی دەستبەسەر کردن، دەرچوونی حوکم و بێ بەشکردن لە خووێندنی بەشێکی بەرچاو لە ژنانی پەیڕەوەی ئەم ئایینە لەلایەن دامەزراوە ئەمنییەکانەوە بووین.

\"13916.jpg\"
نوورا(سمیترا) فەلاح، هاووڵاتیی بەهایی دانیشتوی شیراز
بەپێی ئەو راپۆرتانەی کە بڵاو بوونەتەوە، \"نوورا(سمیترا) فەلاح\" هاووڵاتیی بەهایی دانیشتوی شیراز پاش ئەوەی کە لە ماوەی حەوتووی رابردوودا، چەندین جار لەلایەن وەزارەتی ئیتلاعاتەوە بانگهێشت کرابوو، رۆژی ١٧ی پووشپەڕ پاش ئەوەی سەردانی ئیدارەی ناوبراوی کرد بۆ ماوەی چەندین کاتژمێر لێپرسینەوەی لێ کرا.

نوورا فەلاح پێشتر و لە رێبەندانی ١٣٩٠ دەستبەسەر و بۆ ماوەیەک لە زیندانی وەزارەتی ئیتلاعاتی شیراز کە بە زیندانی \"پلاک ١٠٠\" بەناوبانگە، راگیرابوو.

\"13919.jpg\"
نەسیم ئەشرەفی، هاووڵاتیی بەهایی دانیشتووی تاران
لە لایەکی دیکەوە نەسیم ئەشرەفی هاووڵاتیی بەهایی دانیشتووی تاران، لە لایەن لقی ٢٨ی دادگای شۆڕشی تارانەوە بە دادوەری دادوەر مەقیسە، بە تاوانی پروپاگەندە دژی نیزام و ئەندامەتی لە رێکخستنی بەهاییەکان دا بە ٣ ساڵ زیندانیی تەعزیری مەحکووم کرا.

ناوبراو لە ٢٠ی پووشپەڕی ١٣٩١ لەلایەن هێزە ئەمنییەکانی حکومەتی ئیسلامی ئێرانەوە دەستبەسەر و پاش ٢٠ رۆژ بە دانانی بارمتەی ١٠٠ میلیۆن تومانی ئازاد کرابوو.

\"13913.jpg\"
لوا خانجانی، خوێندکاری بەهایی بێ بەشکراو لە خوێندن
لە لایەکی دیکەوەو بە پێی ئەو راپۆرتانەی کە بڵاو بوونەتەوە، رۆژی چوارشەممە ١٩ی پووشپەڕ، لوا خانجانی خوێندکاری بەهایی بێ بەشکراو لە خوێندن، بۆماوەی چەند رۆژ مەرەخەسی پێ درا.

ئەم هاووڵاتییە بەهاییە کە بە ٢ ساڵ زیندانیی تەعزیری مەحکووم کراوە لە حاڵی تێپەڕکردنی ماوەی حوکمەکەی لە زیندانی \"ئێڤین\" دایە.

گوشار بۆسەر ژنانی بەهایی تەنیا لە چوارچێوەی زیندانی کردنی ئەواندا قەتیس نامێنێتەوە، بەڵکوو زۆر جار دەبینین کە ژنانی بەهایی بە تاوانی پەیڕەوی لەم ئایینە لە زانکۆکانی ئێراندا لە خوێندن بێبەش دەکرێن.

\"13914.jpg\"
ئایدا بەندی، هاووڵاتیی بەهایی و خوێندکاری تێرمی دووەمی بەشی زمان و وێژەی ئینگلیزیی زانکۆی \"پەیام نوور\"ی شیراز
لە ماوەی رۆژانی رابردوو دا، \"ئایدا بەندی\" هاووڵاتیی بەهایی و خوێندکاری تێرمی دووەمی بەشی زمان و وێژەی ئینگلیزیی زانکۆی \"پەیام نوور\"ی شیراز لە خوێندن بێبەش کرا.

بەرپرسانی ئەم زانکۆیە بە \"ئایدا بندی\"یان راگەیاندووە کە بۆ درێژەدان بەخوێندن دەبێ ببیتە موسڵمان یان وەکوو بەهاییەکانی دیکە رێگەی دەرەوەی وڵات بگریتە بەر.

لە ماوەی ساڵانی رابردوو دا چەندین خوێندکاری ئێرانی لە زانکۆکانی تاران، سەنعەتیی شەریف، فیردەوسیی مەشهەد، سەنعەتیی ئیسفەهان و چەندین زانستگەی دیکە بە تاوانی پەیڕەوی کردن لە ئایینی بەهایی بەرەوڕووی دەرکران بوونەتەوە.

دۆخی زیندانیان و چالاکانی ژن لە ئێران دا

رۆژی شەممە رێکەوتی ١٥ی پووشپەڕ، ١١ کەس لە زیندانیانی بەندکراو لە زیندانی ناوەندیی زاهیدان ئێعدام کران کە ٥ کەس لەو ئێعدام کراوانە ژن بوون.

\"13918.jpg\"
ئەم زیندانیانە کە بە تاوانی بازرگانی کردن بە ماددە سڕکەرەکان ئێعدام کراون رۆژی پێنج‌شەممە رێکەوتی ١٣ی پووشپەڕ رەوانەی ژوورە تاکەکەسییەکان کراون و بەرەبەیانی رۆژی شەممە ١٥ی پووشپەڕ ئێعدام کراون.

هەروەها رێکەوتی ١٠ی پووشپەڕ، یەکێک لە زیندانیانی سیاسیی بەندی ژنانی زیندانی ئێڤین بە ناوی\"بسم الجبوری\" دوای سەردانی یەکێک لە کەسانی سەربە وەزارەتی ئیتلاعات بە ناوی \"عەباسی\" بۆ بەندەکەی هەوڵی خۆ کوژیدا کە دەستبەجێ لەلایەن هاوبەندییەکانییەوە رەوانەی بێهداری کرا و لە مەردن رزگاری بوو.

\"بسم الجبوری\" کە یەکێک لە بەرپرسانی پێشووی وەزارەتی بازرگانیی عێراق بووە، بە تاوانی سیخوری بۆ ئەو وڵاتە بە ٥ ساڵ زیندانیی تەعزیری مەحکووم کرا و هەنووکە ماوەی ٢ ساڵە لە زیندانی \"ئێڤین\" دا ماوەی حوکمەکەی تێپەڕ دەکات.

\"13915.jpg\"
سەمیرا رەزاقی، پزیشکی بلیمەت و خوێندکاری زانکۆی زانستە پزیشکیەکانی شیراز
لە لایەکی دیکەوە \"سەمیرا رەزاقی\" پزیشکی بلیمەت و خوێندکاری زانکۆی زانستە پزیشکیەکانی شیراز کە رۆژی ٥ی پووشپەڕ دەستبەسەر کرا بوو، دوای نزیک بە دوو حەفتە راگیران لە زیندانی وەزارەتی ئیتلاعاتی شیراز کە بە زیندانی \"پلاک ١٠٠\" ناسراوە، رۆژی ١٨ی پووشپەڕ لە زیندان ئازاد کرا.

دوکتور سەمیرا رەزاقی لە ماوەی خوێندنی خۆیدا چەندین جار وەکوو قوتابیی نموونە و سەرکەوتوو دەستنیشان کرابوو.

سەرچاوەکان:
ئاژانسی هەواڵدەریی کوردپا
هەواڵدەریی هێرانا
ماڵپەڕی کوردستان میدیا
ماڵپەڕی پەیام
ماڵپەڕی \" جمعیت مبارزە با تبعیض تحصیلی\"