كوردپا، ئاژانسی هەواڵدەریی كوردستان، بە رەچاوكردنی تەواوی پرەنسیپ و بنەما ئەخلاقی و مرۆییەكان بە مەبەستی دۆزینەوە و شەفافسازی راستییەكان چالاكی دەكات
ڕۆژی شەممە ٢٥ی گەلاوێژی ١٤٠٤، هاووڵاتییەک بە ناوی "سەیدحوسێن (زانکۆ) محەممەدی" خەڵكی گوندی "ئاڵیکەند"ی بۆکان بە دانانی بارمتەی ٥٠٠ میلیۆن تمەنی و بە شێوەی کاتی لە بەندیخانەی ئەم شارە ئازاد کرا.
ڕۆژی شەممە ٢٥ی گەلاوێژی ١٤٠٤، ناسر ئەحمەدزادە، هاووڵاتیی خەڵکی مەهاباد بە مەبەستی جێبەجێکرانی سزای بەندکرانەکەی ڕەوانەی بەندیخانەی ئەم شارە کرا.
ڕەحمان ڕەحیمپوور، هاووڵاتیی خەڵکی سەقز، لەلایەن لقی یەکی دادگای ئینقلابی ئەم شارەوە بە تۆمەتی "پڕوپاگەندە دژی نیزام" بە پێنج مانگ بەندکرانی هەڵپەسێردراو بۆ ماوەی دوو ساڵ و پێبژاردنی ١٠ میلیۆن تمەن سزای نەختی سزا درا.
سەرەڕای تێپەڕبوونی زیاتر لە یەک مانگ لە کاتی دەسبەسەرکرانی هاووڵاتییەک بە ناوی محەممەدوڵڵا ڕەزایی، خەڵکی سنە و دانیشتووی دێولان، سەبارەت بە دۆخ و شوێنی ڕاگیرانی ناوبراو زانیارییەک لەبەر دەستدا نییە.
ڕۆژی یەکشەممە ١٩ی گەلاوێژی ١٤٠٤، ڕامین گورگانی، بەندکراوی سیاسیی پێشووی خەڵکی کامێران لەلایەن هێزە ئەمنیەتییەکانەوە دەسبەسەر کرا و بە مەبەستی لێپرسینەوە بۆ گرتنگەی ئیتلاعاتی سنە ڕاگوێزرا.
ڕۆژی دووشەممە ٢٠ی گەلاوێژی ١٤٠٤، ئەمین کەریمی ناسراو بە "ئەمینۆ"، هونەرمەند و ئەکتەری تێئاتری خەڵکی ورمێ پاش کۆتاییهاتنی قۆناغەکانی لێپرسینەوەکەی لە گرتنگەی ئیتلاعاتەوە بۆ بەندیخانەی ناوەندیی ورمێ ڕاگوێزرا.
ڕۆژی سێشەممە ٢١ی گەلاوێژی ١٤٠٤، فەرهاد کەریمی، هاووڵاتیی خەڵکی نەغەدە پاش ٤٠ ڕۆژ دەسبەسەرکرانی کاتی بە دانانی بارمتە لە بەندیخانەی ئەم شارە ئازاد کرا.
ڕۆژی شەممە ١٨ی گەلاوێژی ١٤٠٤، سامان کەریمی، بەندکراوی سیاسیی پێشووی مەحکووم بە سێدارە بە دانانی بارمتەی پێنج میلیارد تمەنی و بە شێوەی کاتی لە بەندیخانەی بانە ئازاد کرا.
ڕۆژی چوارشەممە ١٥ی گەلاوێژی ١٤٠٤، کۆڵبەرێک بە ناوی "خالید ئەحمەدیان" خەڵکی گوندی "سیوچ" سەر بە شاری بانە بە تەقەی هێزە نیزامییەکانی حکوومەت بە سەختی بریندار بوو و بە مەبەستی وەرگرتنی چارەسەی پزیشکی ڕەوانەی نەخۆشخانەیەکی تەورێز کرا.
ڕۆژی چوارشەممە ١٥ی گەلاوێژی ١٤٠٤، هاووڵاتییەکی خەڵکی پیرانشار بە ناوی "زوبەیر مەحموودی" پاش ٢٨ ڕۆژ لێپرسینەوە و دەسبەسەرکرانی سەرەڕۆیانە لە یەکێک لە گرتنگە ئەمنییەتییەکانی ورمێوە بۆ بەندیخانەی نەغەدە ڕاگوێزرا.
ئاژانسی هەواڵدەریی کوردپا
