ڕۆژی هەینی، ١٦ی پووشپەڕی ١٤٠٢، کچێکی تەمەن ١٥ ساڵ بە ناوی "زیلان ئەیوەز"، لە ئاکامی توندوتیژییەکی خێزانیدا و بە هۆی "کێشەی کۆمەڵایەتی"، بەدەستی باوکی لە گوندی "زێوە"، سەر بە شاری پیرانشار کوژرا.
شاهۆ بەرهەم، تەمەن ١٩ ساڵ، کوڕی عیسا و خەڵکی شنۆ، سەرەڕای تێپەڕبوونی ٩ مانگ لە کاتی دەسبەسەرکرانی، چارەنووسی ناڕوونە و لە زیندانی ناوەندیی ورمێ ڕاگیراوە.
سەرلەبەیانیی ڕۆژی پێنجشەممە، ١٥ی پووشپەڕ، کۆڵبەرێک بە ناوی "محەممەد مەزرووعی"، خەڵکی گوندی "باینجان"، سەر بە شاری بانە، لە ئاکامی تەقەی هێزە نیزامییەکانی حکوومەت لە سنووری "هەنگەژاڵ"، بەتوندی بریندار بوو.
سەرلەبەیانیی ڕۆژی هەینی، ١٦ی پووشپەڕ، دوو ئەندامی حیزبی دێموکراتی کوردستانی ئێران، بە ناوەکانی "لوقمان ئاجی" و "عادڵ (سەرباز) موهاجیر"، لەلایەن مۆرەکانی کۆماری ئیسلامیی ئێرانەوە لە هەرێمی کوردستانی عێراق تێرۆر کران.
ڕۆژی سێشەممە، ١٣ی پووشپەڕ، لاوێکی کورد بە ناوی "فەرید چێودار"، کوڕی یووسف و خەڵکی گوندێ "گۆڵێ" سەر بە شاری نەغەدە، لەلایەن هیزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
حەسەن ئەمینی، برای محەممەد ئەمینی، لە گیانلەدەستداوانی بزووتنەوەی ژن، ژیان، ئازادی لەلایەن لقی ١٠١ی دادگای کەیفەری ٢ی بۆکانەوە بە ٦ مانگ و نیو زیندان و لێدانی ٤٠ قامچی مەحکووم کرا.
مامۆستا هادی ئەحمەدی، وتاربێژ و مامۆستای قوتابخانەی زانستی دینیی شەمسولعارفین نەجاری پاوە، بانگهێشتی دادگای تایبەتی ڕۆحانییەت لە کرماشان کرا.
دوانیوەڕۆی ڕۆژی چوارشەممە، ١٤ی پووشپەڕ، هێزە ئەمنییەتییەکان بە بێ بەڵگەی یاسایی هێرشیان کردووەتە سەر ماڵی هاووڵاتییەکی دەسبەسەرکراو بە ناوی "هێمن حوسێنی"، خەڵکی سەقز و دەستیان بە پشکنینی ماڵەکەی کردووە.
ڕۆژی پێنجشەممە، ٨ی پووشپەڕ، مێرمنداڵێکی تەمەن ١٥ ساڵ بە ناوی "ئەرەشک قەیسەربەیگی"، خەڵکی ئیلام و دانیشتووی سەراوڵە، لەلایەن هێزە ئەمنییەتییەکانەوە دەسبەسەر کرا.
ڕۆژی شەممە، ١٠ی پووشپەڕ، هاووڵاتییەکی کورد بە ناوی "ئەحەد تاهیری"، تەمەن ٢١ ساڵ و کوڕی یوونس، خەڵکی نەغەدە، لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
ئاژانسی هەواڵدەریی کوردپا
