ڕۆژی سێشەممە ٣ی ڕەشەمە، کۆبوونەوەی دادگایی پێڕاگەیشتن بە تۆمەتەکانی "جەماڵ یووسفی و حوسێن ئیبراهیمحەمزە" هاووڵاتییانی بۆکانی، پاش ٥ ساڵ لە ناڕوونیی چارەنووسیان لە دادگای ئینقلابی مەهاباد بەڕێوە چوو.
ڕۆژی دووشەممە ٢ی ڕەشەمە، سێ کۆڵبەری کورد بە ناوەکانی "فواد مێهدیئیبراهیمیان"، "کیانووش ڕەئووفی" و "ئامانج ئیبراهیمپوور" خەڵکی شاری سەردەشت، بەهۆی تەقینەوەی مین لە سنووری "هەنگەژاڵـ"ـی بانە، بە سەختی بریندار بوون.
ڕۆژی دووشەممە ٢ی ڕەشەمە، دوو ئەندامی ئەنجومەنی "نۆژین" بە ناوەکانی "پەیام میری" تەمەن ٣٦ ساڵ و "واران (ئەسرا) محەممەدنژاد" تەمەن ٣٠ ساڵ خەڵکی گوندی "تەنگیسەر" و دانیشتووی شاری سنە، لەلایەن هێزە ئەمنییەتییەکانەوە دەسبەسەر کران.
ئێوارەی ڕۆژی دووشەممە ٢ی ڕەشەمە، کۆڵبەرێکی کورد بە ناوی "ئەرکان مەحموودی" تەمەن ٢٥ ساڵ، کوڕی "بارام" و خەڵکی گوندی "میرعەولـ"ـی بەخشی باینگانی پاوە، بەهۆی تەقینەوەی مینێک لە بەرزاییەکانی سنووری شووشمێ لە نەوسوود بە سەختی بریندار بوو.
ڕۆژی دووشەممە ٢ی ڕەشەمە، هێزە ئەمنییەتییەکان بەبێ بەڵگەی یاسایی "گوزەل حاجیزادە" دایکی زەینەب جەلالیان زیندانی سیاسیی کوردیان دەسبەسەر و پاش چەند کاتژمێر لێپرسینەوە، ئازادیان کرد.
کامران تەکووک شاعیر و چالاکی مەدەنیی خەڵکی شاری کرماشان، لەلایەن لقی ١ی دادگای ئینقلابی ئەو شارەوە بە دوو ساڵ و چوار مانگ زیندانی تەعزیری مەحکووم کرا.
ڕۆژی دووشەممە ٢ی ڕەشەمە، سەلاح شەریفزادە زیندانیی سیاسیی کوردی خەڵکی شاری بۆکان، لە زیندانی خەڵخاڵ ئیزنی مەرەخەسیی پێ درا.
ڕۆژی شەممە ٣٠ی ڕێبەندان، هاووڵاتییەکی کورد بە ناوی "سەلاح پزیشکی" خەڵکی شاری بانە، بە دانانی بارمتەی ٢٠٠ ملیۆن تمەنی هەتا کاتی دادگاییەکەی لە زیندانی ناوەندیی سنە ئازاد کرا.
ڕۆژی شەممە ٣٠ی ڕێبەندان، هاووڵاتییەکی کورد بە ناوی "لوقمان سەیدە (جۆڵا)" خەڵکی شاری پیرانشار، لەلایەن هێزە ئەمنییەتییەکانەوە دەسبەسەر کرا.
ئێوارەی ڕۆژی هەینی ٢٩ی ڕێبەندان، ژنێک بە ناوی "فاتمە سامتی" بە کەرەستەکانی چەقۆ و تەور، لەلایەن مێردەکەیەوە کوژرا.
ئاژانسی هەواڵدەریی کوردپا
