ئاژانسی كوردپا: هاووڵاتییەكی كوردی خەڵكی یەكێك لە گوندەكانی دەورووبەری شاری پاوە كە نزیك بە 10 رۆژ لەمەوپێش دەستبەسەر و دواتر ئازاد كرابوو، بۆ جاری دووەم لەلایەن هێزە ئەمنیەتییەکانی حكوومەتەوە دەستبەسەرە و رەوانەی گرتنگە كرا.

بەپێی هەواڵی ئاژانسی هەواڵدەریی كوردپا، ماكوان كەیخوسرەوی كوڕی ئەحمەد و خەڵكی گوندی "شۆشمێ‌"ی سەر بە شاری پاوە كە رێكەوتی 10ی رەزبەر هاوڕێ‌ لەگەڵ دوو كەسی دیكە لەلایەن هێزم ئەمنیەتییەکانی حكوومەتەوە دەستبەسەر كرابوو، پاش ماوەیەك ئازاد كرا و رۆژی دووشەممە رێكەوتی 18ی رەزبەر بۆ جارێكی دووەم قۆڵبەست و رەوانەی گرتنگە كراوەتەوە.

مودریك فەتحی كوڕی عەلائەدین خەڵكی گوندی "نەیسانە" و ماكوان وەیسی كوڕی ئەحمەد خەڵكی هەمان گوند ئەو دوو هاووڵاتییەی دیكە بوون كە لەگەڵ ماكوان كەیخوسرەوی دەستبەر كراون.

هەتا ئێستا لەمەڕ چارەنووسی ئەو دوو كەسەكەی دیكە زانیارییەك لەبەر دەستدا نیە و بە هەواڵنێری ئاژانسی كوردپا نەگەیشتووە.