ئاژانسی هەواڵدەریی کوردپا
١٧ی خەزەڵوەری ١٤٠٥؛ چوارەمین کۆبوونەوەی شێعری «وێرەکانی خەزەڵوەر»، ڕۆژی پێنجشەممە ١٤ی خەزەڵوەری ١٤٠٥، بە بەڕێوەبەریی ئەنجومەنی شێعر و ئەدەبی بانە و بە بەشداریی شاعێرانی شارە جیاوازەکانی کوردستان، لە هۆڵی ئیدارەی فەرهەنگی ئەم شارە بەڕێوە چوو. ئەم کۆبوونەوەیە بە پێشوازیی شاعێران و هۆگرانی ئەدەبیات، لە سێ بەشی شێعرخوێندنەوەدا بەڕێوە چوو. شاعێرانێک لە شارەکانی بانە، سەقز، سەردەشت، نەغەدە، پیرانشار، کرماشان، مەهاباد، هەرسین، ئیلام، مەریوان، پاوە، ئەیوان و سنە لەم بەرنامەیەدا ئامادە بوون و بەرهەمەکانی خۆیان بۆ ئامادەبووان خوێندەوە. ڕێوڕەسمەکە بە ئەنجامدانی سروودی «خوایە وەتەن ئاوا کەی» لەلایەن منداڵانی باخچەی ساوایانی «ساوای زیرەک» بە سەرپەرستیی ژینۆ ڕەسووڵی دەستی پێکرد. لە درێژەدا، شاعێران لە سێ بەشدا شێعریان خوێندەوە. لە نێوان بەشەکانی شێعرخوێندنەوەدا، هونەرمەندانی فۆلکلۆر، «جەلال و سەلام»، بە پێشکەشکردنی گۆرانییە فۆلکلۆرییە کوردییەکان و مەهدی وەکیلی، هونەرمەندی خەڵکی بۆکان، بە پێشکەشکردنی گۆرانی، بەرنامەی هونەرییان بەڕێوە برد. لە بەشێکی دیکەی ئەم کۆبوونەوەیەدا، خەڵاتی ساڵانەی «وێرەکانی خەزەڵوەر» بە مەبەستی ڕێزگرتن و بەرزڕاگرتنی پێگەی شاعێران، نووسەران و چالاکوانی فەرهەنگی و ئەدەبی، بە سێ کەسایەتی بەخشرا؛
● مامۆستا هێرش بێتووشی، شاعێر، نووسەر و وەرگێڕ
● مامۆستا حەسەن ڕەوێش، ناسراو بە «پارێزەر»، شاعێر، نووسەر و چالاکی ژینگەپارێز
● مامۆستا حاجی عەبدوڵڵا هەمزە، شاعێر، نووسەر و چالاکی ئەدەبیی خەڵکی سەردەشت هەروەها، لەوحی ڕێزلێنان پێشکەشی دوو کەس لە ئەندامانی ئەنجومەنی ئەدەبیی بانە کرا: عەلی مەحموودی، ناسراو بە «ئاودێر» و بەرپرسی ئەنجومەنی ئەدەبیی بانە، و ئیسماعیل خەمگین، ئەندامی دەستەی بەڕێوەبەری و دەبیری ئیجراییی کۆبوونەوەی «وێرەکانی خەزەڵوەر».
ئەنجومەنی ئەدەبیی بانە؛ ئەنجومەنی ئەدەبیی بانە لە ساڵی ١٣٦٧دا (لە دوای کۆتاییهاتنی شەڕی ئێران و عێراق) بناغەکەی دانرا و وەک یەکێک لە یەکەمین و پێشەنگترین ڕێکخراوە مەدەنی و ئەدەبییەکان لە کوردستانی ئێران، کەلێنەکانی ساڵانی شەڕی پڕ کردەوە. ئەم ئەنجومەنە بە بەڕێوەبردنی ڕێکوپێکی دانیشتنەکانی ڕەخنە، شێعرخوێندنەوە و کارگەکانی چیرۆکنووسی، بەستێنی بۆ ڕەخساندنی بزووتنەوەیەکی بەردەوام لە شێعری هاوچەرخ و ئەدەبیاتی چیرۆکیدا (بە هەردوو زمانی کوردی و فارسی) پێک هێنا و نەوەیەک لە نووسەران، وەرگێڕان و ڕەخنەگرانی بەرجەستەی بە کۆمەڵگەی ئەدەبی ناساند. گرنگترین دەستکەوت و خاڵی وەرچەرخانی کارنامەی ئەم ئەنجومەنە، دامەزراندنی «فێستیڤاڵی سەرانسەریی چیرۆکی بانە» بوو؛ ڕووداوێکی پێگه‌دار کە بانەی کردە یەکێک لە جەمسەرە سەرەکییەکانی چیرۆکنووسی لە ئێراندا. ئەم دامەزراوە ئەدەبییە بەردەوامە سەرەڕای هەموو ئاستەنگ و هەوراز و نشێوەکانی دەیەی ٦٠ و ٧٠، ڕۆڵێکی بەرچاوی لە پاراستنی ناسنامەی فەرهەنگی، بەهێزکردنی بزووتنەوە پێشەنگەکانی ئەدەبی و دروستکردنی پردی پەیوەندی لە نێوان ئارەزوومەندان و بزووتنەوە پیشەیییەکانی ئەدەبیات لە ناوچەکەدا گێڕاوە.
