ڕۆژی پێنجشەممە ٩ی گەلاوێژ، کۆڵبەرێکی کورد بە ناوی "وەزیر محەممەدی" کوڕی "ئەحمەد" خەڵکی گوندی "حەشمەر"ی شاری سەلاسی باوەجانی، لە ئەنجامی تەقەی هێزە نیزامییەکانی حکوومەت لە سنووری نەوسوود گیانی لەدەست دا.
لە ماوەی ڕۆژانی ڕابردوودا، حوکمی ٦ مانگ زیندانیی تەعزیری و ٥ ساڵ زیندانیی تەعلیقی بۆ "هادی کەمانگەر" چالاکی ژینگەپارێزیی خەڵکی کامیاران ڕاگەیەندرا.
لە ماوەی ڕۆژانی ڕابردوودا، حوکمی ٨ ساڵ و ٨ مانگ زیندانی بۆ "فازڵ قوەیتاسی" چالاکی ژینگەپارێزی، "ئامانج قوربانی" کارناسی باڵای ژینگە و فەرمانبەری ئیدارەی ژینگەپارێزیی شاری کامیاران و "سیروان قوربانی" چالاکی ژینگەپارێزی ڕاگەیەندرا.
لاوێکی کورد بە ناوی "ئازاد دانشوەر"، کوڕی "حامی"، تەمەن ۲۲ ساڵ و خەڵکی گوندی یەنگیجەی مەریوان لەلایەن ئیتلاعاتی سپای پاسدارانەوە دەسبەسەر کراوە.
ڕۆژی شەممە ٤ی گەلاوێژ، هاووڵاتییەک بە ناوی "ڕەحیم پوورئەحمەد" کوڕی "عومەر"، تەمەن ٤٠ ساڵ و خەڵکی گوندی "قازانلی" لە ناوچەی سایین قەڵا، بۆ تێپەڕاندنی ماوەی زیندانییەکەی ڕەوانەی زیندانی میاندواو کرا.
ڕۆژی شەممە ٤ی گەلاوێژ، لاوێکی سەرپێڵ زەهاوی بە ناوی "هادی عەزیزی" تەمەن ٢٠ ساڵ، لەلایەن هێزە ئەمنییەتییەکانەوە دەسبەسەر کرا و بۆ شوێنێکی نادیار ڕاگوێزرا.
ڕۆژی دووشەممە ٦ی گەلاوێژ، لاوێکی مەهابادی بە ناوی "مەتین خولە" کوڕی "ئیدریس"، تەمەن ١٦ ساڵ و خەڵکی مەهاباد، پاش تەواوبوونی ماوەی لێپرسینەوەکەی بە دانانی بارمتەی ٨٠ ملیۆن تمەنی بە شێوەی کاتی لە گرتنگە ئازاد کرا.
ڕۆژی چوارشەممە ١ی گەلاوێژ، هاووڵاتییەکی کورد بە ناوی "هادی عەلی پوور" تەمەن ٣٥ ساڵ خەڵکی گوندی "سونەتە"ی ناوچەی تیلەکۆی سەقز لە گوندی "ئێرانشا"، لەلایەن هێزە ئەمنییەتییەکانی حکوومەتەوە دەسبەسەر کرا و بۆ شوێنێکی نادیار ڕاگوێزرا.
ڕۆژی یەکشەممە ٥ی گەلاوێژ، ژمارەیەک لە کۆڵبەرانی کورد لە سنووری بانە، کرانە ئامانجی تەقەی هێزە نیزامییەکانی حکوومەت و لە ئەنجامدا ٥ کۆڵبەر پێکران.
هاووڵاتییەکی کورد بە ناوی "فەریدە ساڵحی" خەڵکی شاری مەریوان، پاش ١٧ ساڵ بە یارمەتیی خێرخوازان، چالاکانی مەدەنی و مافی مرۆیی دژی ئێعدام، لە ئێعدام ڕزگاری بوو و ئازاد کرا.
ئاژانسی هەواڵدەریی کوردپا
