ڕۆژی شەممە ٢٠ی بەفرانبار، سێ هاووڵاتیی کورد بە ناوەکانی "بەهمەن یووسفزادە کوڕی حەمزە، فەرهاد و فەرەیدوون مووساپوور کوڕی ڕەحیم" خەڵکی شاری "ڕەبەتـ"ـی سەردەشت، لەلایەن هێزە ئەمنییەتییەکانەوە دەسبەسەر کران.
ڕۆژی هەینی ١٩ی بەفرانبار، هاووڵاتییەکی کورد بە ناوی "کاروان مینوویی" خەڵکی شاری مەریوان، لەلایەن هێزە ئەمنییەتییەکان دەسبەسەر کراوە و بۆ شوێنێکی نادیار ڕاگوێزراوە.
ڕۆژی شەممە ٢٠ی بەفرانبار، ژنە هاووڵاتییەکی کورد بە ناوی "عەزیمە ناسری" خەڵکی شاری بۆکان، لەلایەن هێزە ئەمنییەتییەکانەوە دەسبەسەر کرا.
ڕۆژی شەممە ٢٠ی بەفرانبار، دوو خوێندکاری کورد بە ناوەکانی "فەرزاد سامانی" خەڵکی شاری مەهاباد و "سوهەیب بادرووج" خەڵکی شاری مەریوان لە خەوتنگەی زانکۆی خاڕەزمی دەسبەسەر کراون و بۆ شوێنێکی نادیار ڕاگوێزران.
ڕۆژی هەینی ١٩ی بەفرانبار، چالاکێکی ژینگەیی بە ناوی "دانا سەمەدی" خەڵکی شاری مەریوان، لە لایەن هێزە ئەمنییەتییەکانەوە دەسبەسەر و بۆ شوێنێکی نادیار ڕاگوێزراوە.
ڕۆژی هەینی ١٩ی بەفرانبار، کۆڵبەرێکی کورد بە ناوی "ئومید ساڵحی" کوڕی یەدوڵڵا خەڵکی گوندی "نگڵـ"ـی بەخشی کەڵاتەرزانی شاری سنە، بەهۆی تەقەی هێزە نیزامییەکانی حکوومەتی لە بەرزاییەکانی ملەی "تەتە" پێکرا.
هێزە ئەمنییەتییەکان لە شاری کرماشان، هەڕەشەی دەسبەسەرکردنی بنەماڵەی جەوانمیر مورادی، ئەندامی یەکیەتیی ئازادی کرێکارانی ئێرانیان کرد.
ڕۆژی شەممە ٢٠ی بەفرانبار، هاووڵاتییەکی کورد بە ناوی "شەپۆل خزرپوور" کوڕی حوسێن خەڵکی گەڕەکی "بەری شیلانانـ"ـی شاری مەهاباد، لەلایەن هێزە ئەمنییەتییەکانەوە دەسبەسەر کرا.
لە ماوەی ڕۆژانی ڕابردوودا، هاووڵاتییەکی کورد بە ناوی "ئومید مەعرووف" خەڵکی گوندی "ئاڵیاوێ"ی شنۆ، پاش تەواوبوونی ماوەی لێپرسینەوەکەی، لە یەکێک لە گرتنگە ئەمنییەتییەکان لە ورمێ، بۆ زیندانی شنۆ ڕاگوێزراوە.
ڕۆژی پێنجشەممە ١٨ی بەفرانبار، چالاکێکی ژینگەیی کورد بە ناوی "خەبات مەفاخری" خەڵکی شاری سنە، بە دانانی بارمتە ئازاد کرا.
ئاژانسی هەواڵدەریی کوردپا
